काठमाडौं। दक्षिण कोरियामा रोजगारी आठौँ महिनासम्म निरन्तर वृद्धि भएको छ। राष्ट्रिय सांख्यिकी कार्यालयका अनुसार १५ वर्षभन्दा माथिका व्यक्तिहरूको रोजगार अगस्ट महिनामा एक लाख ६६ हजार (०.६ प्रतिशत) ले बढ्दै दुई करोड ८९ लाख ६७ हजार पुगेको हो।

यो दरले जनवरीदेखि देखिएको स्थिर वृद्धिलाई निरन्तरता दिएको छ। यद्यपि, अगस्ट महिनाको वृद्धि दर जुलाईमा भएको एक लाख ७१ हजारको तुलनामा केही कम छ।

रोजगार वृद्धिमा विशेष योगदान वरिष्ठ नागरिकको छ। ६० वर्षभन्दा माथिका लागि चार लाख एक हजार रोजगारी थपिएका छन् भने ३० वर्ष समूहमा ९६ हजार रोजगारी बढेका छन्। तर, १५–२९ वर्षका युवाको रोजगार दुई लाख १९ हजारले घटेको छ। ४० वर्ष समूहमा ७३ हजार र ५० वर्ष समूहमा ३८ हजारले रोजगारी गुमाएका छन्।

क्षेत्रगत हिसाबले, निर्माण क्षेत्रमा ६१ हजार रोजगार घटेको छ, जसले १४ महिनादेखिको गिरावटलाई निरन्तरता दिएको छ।

अगस्ट महिनामा बेरोजगारको संख्या पाँच लाख ९२ हजार पुगेको छ, जुन गत वर्षको तुलनामा २८ हजार बढी हो। बेरोजगारी दर ०.१ प्रतिशत बढेर २.० प्रतिशत पुगेको छ। विस्तारित बेरोजगारी दर भने ०.१ प्रतिशत घटेर ८.२ प्रतिशतमा पुगेको छ।

तर युवापुस्ताको बेरोजगारी दर अझै उच्च छ। १५–२९ वर्ष उमेर समूहमा बेरोजगारी ०.६ प्रतिशत बढेर १५.३ प्रतिशत पुगेको छ।

राष्ट्रिय कार्यालयका अनुसार आधिकारिक बेरोजगारी दरले केवल पछिल्ला चार हप्तामा सक्रिय रूपमा काम खोजेका तर नपाएका व्यक्तिलाई मात्र समेट्छ।