काठमाडौँ। घटस्थापनायता उपत्यकामा १७५ सवारीसाधन दुर्घटनामा नौजनाले ज्यान गुमाएका छन्।

दसैँको घटनस्थापनादेखि आजसम्म उपत्यकामा १७५ वटा सवारीसाधन दुर्घटना भएको उपत्यका ट्राफिक कार्यालयका प्रवक्ता एवं प्रहरी उपरीक्षक नरेशराज सुवेदीले जानकारी दिए। उनका अनुसार यी दुर्घटनामा १८८ जना सख्त घाइते भएका छन्। अधिकांश घटना रातिको समयमा भएका हुन्।

उनका अनुसार ट्राफिक प्रहरीको सक्रियतामा गत वर्षको तुलनामा यस वर्षको दसैँमा काठमाडौँ उपत्यकामा सवारीसाधन दुर्घटनामा कमी आएको छ। ‘हामीले दसैँ सुरु हुनुअघिदेखि नै सवारीसाधनको जाँचलाई कडाइ गरेका थियौँ। मापसे, चालक अनुमतिपत्र (लाइसेन्स) निरीक्षण तथा गति सीमामा ध्यान दिने कुरामा पनि ट्राफिक प्रहरी सक्रिय थियो,’ उनले भने।

ट्राफिक प्रहरीले सवारीसाधन चालकलाई विशेषगरी रातिको समयमा चलाउँदा सावधानी अपनाउन, मादक पदार्थ सेवन नगर्न, ट्राफिक नियमको पूर्ण पालना गर्न र सुरक्षित यात्राका लागि सवारी जाँचलाई समर्थन गर्न आह्वान गरेको छ।

रातिको समयमा सडक सुनसान हुने, चालकले सावधानी नअपनाउने र कतिपय अवस्थामा नशाको अवस्थामा तीव्र गतिमा गाडी चलाउनेजस्ता कारणले दुर्घटनाको जोखिम बढ्ने गरेको प्रवक्ता सुवेदीको भनाइ छ।

चाडपर्वमा रमाइलो गरेर राति घर फर्कनेको चाप, रमाइलो गर्ने उत्साह र समयको हतारोले गर्दा सवारी दुर्घटनाको जोखिम बढ्ने भएकाले उपत्यका ट्राफिक प्रहरीले नागरिकलाई अझ बढी सतर्क रहन आग्रह गरेको छ।