काठमाडौँ। मानव अंग बेचबिखनमा संलग्न भएको आरोपमा प्रहरीले दुईजनालाई पक्राउ गरेको छ।

जिल्ला प्रहरी परिसर काठमाडौँको टोलीले आज (सोमबार) सर्वसाधारणलाई ललाइफकाइ प्रलोभनमा पारी भारतमा लगेर उनीहरुको मिर्गौलाको अवैध बिक्री गरेको आरोपमा दुईजनालाई पक्राउ गरेको हो।

पक्राउ पर्नेमा रामेछाप मन्थली नगरपालिका १६ घर भई हाल काठमाडौँको बूढानीलकण्ठ बस्ने ३४ वर्षीय मोतीलाल तामाङ र सुनसरीको इटहरी नगरपालिका बस्ने ४७ वर्षीय नारायण वन रहेको परिसरका प्रवक्ता (प्रहरी उपरीक्षक) पवनकुमार भट्टराईले जानकारी दिए।

प्रवक्ता भट्टराईका अनुसार पक्राउ परेका दुवैलाई आवश्यक अनुसन्धान तथा कारबाहीका लागि मानव बेचबिखन अनुसन्धान ब्युरो बबरमहल पठाइएको छ।