किएभ। युक्रेनी राष्ट्रपति भोलोदिमर जेलेन्स्कीले सोमबार यसै हप्ता अमेरिकाका राष्ट्रपति डोनाल्ड ट्रम्पसँग भेट्न वासिङ्टन जाने तयारीमा रहेको घोषणा गरेका छन्।
उक्त भेटवार्ताको प्रमुख उद्देश्य हवाई सुरक्षा सुदृढीकरण र रूसमाथि थप दबाब दिने रणनीतिबारे छलफल गर्नु रहेको बताइएको छ।
राष्ट्रपति जेलेन्स्कीले अमेरिकी राजनीतिज्ञहरू र कम्पनीहरूसँग पनि वार्ता गर्ने युक्रेनी उच्चस्तरीय प्रतिनिधिमण्डलमा सामेल हुने बताए सो प्रतिनिधिमण्डलले शुक्रबार राष्ट्रपति ट्रम्पसँग भेट हुने अपेक्षा राखेको छ।
एक पत्रकारले राष्ट्रपति ट्रम्पलाई शुक्रबार ह्वाइट हाउसमा जेलेन्स्कीलाई स्वागत गर्ने योजना छ वा छैन भनेर प्रश्न गर्दा उनले छोटकरीमा ‘मलाई लाग्छ, हो’ भनेर जवाफ दिएका थिए। ट्रम्पले उक्त प्रतिक्रिया मध्यपूर्वबाट वासिङ्टन फर्कने क्रममा गरिएको छोटो इन्धन स्टपका बेला दिएका हुन्।
जेलेन्स्कीले सप्ताहन्तमा राष्ट्रपति ट्रम्पसँग दुई पटक टेलिफोन वार्ता भएको पुष्टि गर्दै ती संवादहरूमा युक्रेनले सामना गरिरहेका ‘गम्भीर चुनौतीहरू’ — विशेष गरी रुसी आक्रमणले देशको ऊर्जा पूर्वाधारमा पारिरहेको प्रभाव र युद्धमैदानको अवस्थाबारे छलफल भएको जानकारी दिए।
“हामीले केही संवेदनशील विषयहरूमा गहन छलफल गर्यौँ। वार्ता ठोस थियो, तर त्यो पर्याप्त थिएन”, जेलेन्स्कीले किएभमा युरोपेली सङ्घ (इयु) का शीर्ष कूटनीतिज्ञ काजा कल्लासको भ्रमणको अवसरमा आयोजित पत्रकार सम्मेलनमा भने।
युक्रेनी राष्ट्रपति कार्यालयका अनुसार वासिङ्टनको भ्रमणमा सहभागी हुन प्रधानमन्त्री युलिया स्विरिडेन्को, राष्ट्रपति कार्यालयका उच्च अधिकारीहरू, राष्ट्रिय सुरक्षा परिषद्का प्रतिनिधिहरू र अन्य वरिष्ठ कूटनीतिज्ञहरू समावेश भएको प्रतिनिधिमण्डल यसअघि नै अमेरिकातर्फ प्रस्थान गरिसकेको छ।
जेलेन्स्कीले वासिङ्टन पुग्नेबित्तिकै अमेरिकी सैन्य कम्पनीका प्रतिनिधिहरू, सिनेटरहरू र सांसदहरूसँग थप उच्चस्तरीय बैठकहरू गर्ने योजना बनाएको बताए।
“मुख्य विषयहरू हाम्रा हवाई सुरक्षाको सुदृढीकरण र रूसमाथि थप दबाब सिर्जना गर्ने सम्भावनाहरू हुन्”, उनले जोड दिए।
