धनगढी। नेपाली कांग्रेसका केन्द्रीय सदस्य एवं शिक्षा विभाग प्रमुख नैनसिंह महरले चालु केन्द्रीय समितिसमक्ष वर्तमान विषम् परिस्थितिमा जिम्मेवार पदाधिकारीका तर्फबाट १५औं महाधिवेशनको कार्यतालिका नआउनु दुखद् भएको बताएका छन्।

नेपाल प्रेस युनियन कैलालीले धनगढीमा आइतबार आयोजना गरेको पत्रकार सम्मेलनमा उनले समयमै महाधिवेशनको कार्यतालिका नआउँदा पदाधिकारीको कार्यक्षमतामाथि प्रश्न उठ्न सक्ने चिन्ता जनाए। कांग्रेस विधानअनुसार पदाधिकारीहरुको कार्यविभाजन भएको तर समयमै आ-आफ्नो जिम्मेवारी पूरा गर्न नसक्दा १५औं महाधिवेशन समयमै सम्पन्न गर्न चुनौती देखिएको उनले औंल्याए।

‘निर्वाचन सम्पन्न गर्न पहिलो विषय नै क्रियाशील सदस्यता नवीकरण, वितरण र व्यवस्थापन भएकाले आजसम्म उक्त कार्य सम्पन्न गर्न नसक्दा महाधिवेशन समयमै नहुने हो कि भन्ने संशय पैदा भएको छ। त्यसैले अब महाधिवेशनको मिति तय गर्न ढिला गर्नु हुँदैन,’ उनले भने। सामाजिक सञ्जालमा भन्दा पनि आधिकारिक रुपमा जिम्मेवार पदाधिकारीका तर्फबाट महाधिवेशनको कार्यतालिका केन्द्रीय समिति बैठकमा यथाशक्य चाँडो आउनुपर्ने उनको धारणा छ।

यस्तै उनले कांग्रेसले युवापुस्तामा नेतृत्व हस्तान्तरण गर्नुपर्ने बताएका छन्। जेनजीको माग सम्बोधन हुने गरी कांग्रेसले नेतृत्व पुस्तान्तरण गर्नुपर्ने बताएका हुन्। ‘हामी नेतृत्व लिन सक्षम छौं। कांग्रेसको राम्रो उत्तराधिकारी बन्न हामी सबल छौं। हामी कांग्रेसको शीष नेतृत्व सम्हाल्न सक्छौं। हामी सांसद, मन्त्री र प्रधानमन्त्री बनेर देश हाक्न सक्ने क्षमता विस्तार गरिसकेका छौं,’ उनले भने। त्यसका लागि कांग्रेसले जनतामाझ परीक्षण हुन बाँकी र सक्षम युवा नेताहरुलाई अवसर दिने बेला आएको र जेनजीहरुको माग पनि यही रहेको उनको धारणा छ।

‘तीन पटक सांसद र मन्त्री भइसकेकाहरु, पूर्व र वर्तमान पदाधिकारीहरु, सरकार सञ्चालनको संयन्त्रमा बसेकाहरु र केपी ओलीको नेतृत्वमा बसेकाहरुले एकपटक कुलिङमा बस्नुपर्छ,’ उनले भने। कांग्रेसमा अवसरको न्योचित वितरण भएन भन्ने ठुलो असन्तुष्टि रहेकाले त्यसलाई पार्टीले सम्बोधन गर्न सक्नुपर्ने उनले बताए।

‘हामी ११ जना केन्द्रीय सदस्यले पहिले नै गठबन्धनको सरकार निर्माण गर्नु हुँदैन भनेर कांग्रेस बैठकमा फरक कुरा राखेका थियौं। माओवादीसँगको गठबन्धन लामो जान्छ भन्ने प्रस्ताव पदाधिकारी तहबाटै आएको थियो। तर, गठबन्धन लामो समय जान सकेन। यस्ता विषयको आकलन गर्न नसक्नु पनि नेतृत्वको कमजोरी हो,’ उनले भने। यस्ता परिस्थितिको नेतृत्वले बेलैमा आकलन गर्न सक्नुपर्ने उनले बताए।

महरले देश र कांग्रेस बनाउने हुटहुटी नेतृत्वमा नपुगीकन कार्यान्वयन गर्न सहज नहुने भएकाले आफू त्यसका लागि सक्षम र तयार रहेको बताएका छन्। ‘म पार्टीभित्रको जुनसुकै जिम्मेवारीका लागि पनि तयार र सक्षम छु,’ उनले भने। सुदूरपश्चिमका लागि तपाईं देउवाको अबको उत्तराधिकारी हो भन्ने पत्रकारको प्रश्नमा महरले भने, ‘म त्यसका लागि सक्षम छु। मैले आफूभन्दा सिनियर सबैको सहयोग र सद्‌भाव पाउने अपेक्षा पनि गरेको छु। शीर्ष नेतृत्वको सम्मान गर्दै पार्टीलाई एकताबद्ध बनाएर लैजाने क्षमता विस्तार हामीले गरिसकेका छौँ।’