तनहुँ। तिहार दाजुभाइ र दिदीबहिनीको पर्व हो। यस पर्वमा दिदीबहिनीले दाजुभाइलाई टीका लगाएर दीर्घायुको कामना गर्छन्। तर, तनहुँको व्यास नगरपालिका– १०, सेवरका मदन र सुमन तिमिल्सिना दाजुभाइले एकापसमा भाइटीका लगाएका छन्। आज उनीहरूले शुभसाइतमा एकापसमा टीका लगाएका हुन्।
सुरुमा दाजु मदनले भाइ सुमनलाई पानी र तेलको धारो चुहाउँदै फेरो मारे। भाइटीकाको प्रक्रियाअनुसार निधारमा सप्तरंगी टीका लगाएर उनले फूलको माला गलामा पहिराइ दिए । भाइको शत्रुनाश र दीर्घायुको कामना गर्दै ओखर फोरे। त्यसपछि भाइ सुमनले दाजु मदनलाई भाइटीका लगाइदिए।
विगत आठ वर्षदेखि मदन र सुमनले यसरी नै एकअर्कालाई टीका लगाएर भाइटीका मनाउँदै आएका छन्। दिदीबहिनी नभएपछि आठ वर्षदेखि भाइटीका यसैगरी मनाउँदै आइरहेको दाजु मदनले बताए।
उनले भने, ‘विगतमा आफन्त दिदीबहिनीको हातबाट टीका थाप्दै आइरहेका थियौँ। उनका आफ्नै दाजुभाइ विदेश गएपछि हामीलाई टीका लगाउन आउन छोडे। हामी टीका थाप्न कुरिरहेका थियौँ। नआएपछि मन खल्लो भो। त्यसपछि हामी दाजुभाइले नै भाइटीका गर्ने सोच बनाएर सुरु गर्यौँ। त्यसपछि निरन्तर एकअर्कालाई टीका लगाएर भाइटीका मनाउँदै आइरहेका छौँ।’
मदन र सुमनले भाइटीका गर्दा सुरुमा धेरैले अनौठो माने। दाजुभाइबीच भाइटीका लगाउने सामाजिक मान्यता थिएन। तिहारको मुख्य दिन भाइटीका, दिदीबहिनीले दाजुभाइलाई निधारमा सप्तरंगी टीका, गलामा मखमली र सयपत्रीको माला पहिर्याइदिएर दीर्घायुको कामना गरी मनाउँछन्।
