काठमाडौं। नेपाली कांग्रेस केन्द्रीय समिति बैठक पर्सि (आइतबार)का लागि सारिएको छ।

कार्यवाहक सभापति पूर्णबहादुर खड्का र महामन्त्रीद्वय गगन थापा र विश्वप्रकाश शर्माबीच महाधिवेशन कार्यतालिका ल्याउने विषयमा सहमति हुन नसक्दा बैठक स्थगन भएको हो।

“कार्यतालिकामा कुरा नमिलेर आइतबार दिउँसो १ बजे बस्ने गरेर बैठक स्थगन भयो,” एक केन्द्रीय नेताले भने।

कांग्रेसमा संस्थापन पक्ष चुनावपछि १५औं महाधिवेशन गर्नेगरी कार्यतालिका ल्याउने पक्षमा छ। तर, महामन्त्रीद्वयसहितको समूह भने मंसिरमा नियमित महाधिवेशन गर्ने गरी कार्यतालिका ल्याउनुपर्ने अडानमा छन्। यो विषयमा कांग्रेस दुई धारमा बाँडिएको छ।

कार्यतालिका ल्याउने विषयमा आज (शुक्रबार) बिहान नेता शेखर कोइरालासँग पनि महामन्त्रीद्वयले संवाद गरेका थिए। १६ पुसमा केन्द्रीय महाधिवेशन नियमित गर्ने गरी कार्यतालिका ल्याउन सकिने र दबाब दिने निर्णय भएको थियो। त्यसपछि महामन्त्रीद्वय र कार्यवाहक सभापति छलफलमा बसेका थिए। छलफल सहमतिमा नपुग्दा केन्द्रीय समिति बैठक स्थगन गरिएको हो।