गोरखा। उत्तरी गोरखाबाट एक सुत्केरी र शिशुको उद्धार गरिएको छ। सडक सञ्जालले नजोडेको चुमनुब्री गाउँपालिका ६, ताजुबाट सुत्केरी रिञ्जिन पाल्मो लामालाई शिशुसहित आज (बुधबार) सिम्रिक एयरको हेलिकोप्टरबाट उद्धार गरिएको हो। गाउँपालिकाका स्वास्थ्य शाखा प्रमुख प्रेम गुरुङका अनुसार आमा र शिशुलाई उपचारका लागि गण्डकी अस्पताल पोखरा लगिएको छ
गण्डकी प्रदेशको जोखिममा परेका सुत्केरी तथा गर्भवती महिलाको हवाई उद्धार कार्यक्रमअन्तर्गत उद्धार गरिएको स्वास्थ्य शाखा प्रमुख गुरुङको भनाइ छ।
लामाको यो पहिलो सुत्केरी हो। उनले चुम्चेत स्वास्थ्य चौकीमा बच्चा जन्माएको अनमी कल्पना सिंहले जानकारी दिइन्। अवधि पूरा नभई सुत्केरी भएको र शिशुको तौल कम भएसँगै दूध चुस्नै नसकेकाले तत्काल उद्धार गर्नुपरेको अनमी सिंहले बताइन्।
