काठमाडौँ। बिहानीको सूर्योदय। पहेँलिँदै र रातो हुँदै पारि आकाशमा विस्तारै सूर्यको आकार देखिने सूर्योदयको मनमोहक दृश्य, सूर्यको उदाउँदो किरणले राताम्मे बनेर टल्किएका हिमाल। अनि किनै बेरपछि हरिया डाँडामा देखिने बादल र शिरमा देखिने लामा टल्किएका हिमाली दृश्य। यी अहिले भक्तपुरको चाँगुनारायण नगरपालिका ६‚ नगरकोटको डाँडाबाट देखिने दृश्य हुन्।

सूर्योदयदेखि सूर्यास्तसम्म, विश्वको अग्लो हिमाल सगरमाथादेखि विभिन्न आकर्षक १० हिमाली दृश्य अवलोकनको केन्द्रविन्दु बनेको नगरकोट अचेल आन्तरिक र बाह्य पर्यटकको आगमनको प्रमुख गन्तव्य बनेको छ। नगरकोटसँगै विश्व सम्पदा सूचीमा सूचिकृत चाँगुनारयण मन्दिरसहित सम्पदालाई पर्यटन प्रवर्द्धनका माध्यमबाट विश्वभर चिनाउने उद्देश्यले चाँगुनारायण नगरपालिकाले गत १ वैशाखदेखि आगामी चैत मसान्तसम्मका लागि आयोजना गरेको ‘नगरकोट भ्रमण वर्ष-२०८२’ ले पर्यटकलाई थप आकर्षित बनाएको छ।

पर्यटकीय क्षेत्र नगरकोट जाने मुख्य सडक ११ वर्षसम्म निर्माण कम्पनीले अलपत्र पारेपछि करिब १७ करोड रुपैयाँमा उक्त मार्ग नगरपालिकाले कालोपत्र गरेसँगै नगरकोट जान सहज भएपछि पर्यटकको आगमन बढेको पर्यटन व्यवसायी बताउँछन्।

नगरकोटबाट देखिन्छ सगरमाथासहित १० उत्कृष्ट हिमशृंखला

नगरकोट बसपार्कसँगै रहेको होटेल मेरिगोल्डका सञ्चालक एवं पर्यटन व्यवसायी गोकुल लामिछानेले ११ वर्षदेखि सुस्ताएको पर्यटन व्यवसाय सडक कालोपत्र गरेपछि फस्टाएको बताए। उनले भने‚ “यसअघि यहाँको पर्यटन व्यवसाय सडककै कारणले सुस्ताएको थियो।” एघार वर्षसम्म एउटा ठेकेदारले सडक मात्रै अलपत्र पारेन, सिंगो पर्यटन व्यवसाय नोक्सानमा पारेको उनको भनाइ छ।

लामिछानेले भने, “सडककै कारणले नगरकोट आउने पर्यटक घटेका थिए, सोही कारण व्यवसायीले मार खेप्नुपर्‍यो तर अहिले चाँगुनारायण नगरपालिकाले भ्रमण वर्ष सुरु गरेसँगै नगरप्रमुख जीवन खत्रीको नेतृत्वमा सडक कालोपत्र गराएपछि पर्यटकको आगमन बढेको छ, यहाँका व्यवसायीमा अहिले उत्साह थपिएको छ।”

नगरकोटस्थित होटेल चौतारीका सञ्चालक एवं पर्यटन व्यवसायी बद्री माकले पर्यटकको आगमनले व्यवसायमा लगानी थप गर्न आँट आएको बताए। २०७२ को भूकम्पले भत्किएको होटेललाई नयाँ स्वरुपमा निर्माण गरेर व्यवसायमा लगानी बढाएको बताउँदै उनले बिदा र शुक्रबार अग्रिम बुकिङ नगरे ठाउँ पाउन मुस्किल पर्ने उल्लेख गरे।

नगरकोटका होटेलदेखि डाँडाहरूबाट देखिने सूर्योदय, सूर्यास्त, सगरमाथा र हिमाली दृश्यले पर्यटकको मन आनन्दित बनाउने बताउँदै उनले आन्तरिक पर्यटक एक रात बसेर जाने र बाह्य पर्यटक तीन-चार दिनसम्म नगरकोटमा रमाउने जानकारी दिने।

नगरप्रमुख खत्रीले भूकम्प, कोरोना र अलपत्र सडकका कारण थिलथिलो बनेको यहाँको पर्यटन व्यवसाय अहिले चलायमान बन्दै गएको बताए। सरकारले नगरकोट सडकको ठेक्का रद्द गरेलगत्तै नगरपालिकाले तीव्र गतिमा भक्तपुर-नगरकोट १४ किलोमिटर सडक कालोपत्र सम्पन्न गराएपछि पर्यटकको आगमन बढेको उनले भनाइ छ।

नगरप्रमुख खत्रीले भने, “चाँगुनारायणबाट नगरकोटसम्म यहाँका प्रमुख पर्यटकीय गन्तव्य छन्। त्यसैले नगरले निर्णय गरेर नगरकोट सडकको स्तरोन्नतिका लागि बोलपत्र आह्वान गरेर तीव्र गतिमा निर्माण सम्पन्न गरायौँ, यहाँको पर्यटन व्यवसायको विकास र प्रचारका लागि नगरकोट भ्रमण वर्षको सुरुआत गरेका छौँ, पर्यटकको आगमनले व्यवसायी उत्साहित हुनुहुन्छ।”

पर्यटकको आगमन बढेसँगै व्यवसायीले पनि होटेलमा लगानी बढाउन थाले

चाँगुनारायण, मण्डनदेउपुर र बनेपा नगरपालिकाको समन्वयमा पर्यटन प्रवर्द्धनका लागि संयुक्त रूपमा गुरुयोजना निर्माण गरी अगाडि बढ्ने सहमति बनेको बताउँदै भ्रमण वर्ष सफल पार्न सबै नगरपालिकाको क्रियाशीलता रहेको उनले उल्लेख गरे। नगरकोटमा सामान्य, मध्यमवर्गदेखि उच्च तहका व्यक्तिहरू बस्न सक्ने गरी सामान्यदेखि पाँचतारे र साततारेसम्मका होटेल सञ्चालनमा आएका जनाउँदै नगर प्रमुख खत्रीले नयाँ होटेल पनि धमाधम थपिँदै गएका बताए।

“नगरकोटलाई पर्यटकीय क्षेत्र घोषणा गराउन सरकारसँग संवादमार्फत पहल गरिरहेका छौँ। पर्यटन प्रवर्द्धनका लागि प्रदेश र केन्द्रीय सरकारसँग पनि पहल गर्दै जाने छौँ,” नगर प्रमुख खत्रीले भने। नगरकोटको प्रकृति, संस्कृति र समुदायलाई बचाउँदै यस क्षेत्रका बस्ने, महसुस गर्ने, सिक्ने, प्रचार गर्ने र अनुसन्धान गर्ने विषयमा योजनाबद्ध काम गर्दै जाने उनले बताए।

पर्यटन व्यवसायी एवं होटेल पिसफुल नगरकोटका सञ्चालक रामशंकर ध्वजूले यहाँ पर्यटकको आगमन बढेपछि व्यवसायीले होटेलमा लगानी बढाउन थालेका बताए। नगरकोटको विकासमा भक्तपुर, काभ्रे र काठमाडौँ जिल्लाले लगानी बढाउनुपर्नेमा उनले जोड दिए।

काठमाडौँबाट ३२ किलोमिटर उत्तर-पूर्वमा र भक्तपुर नगरबाट २० किलोमिटर पूर्वमा अवस्थित नगरकोट समुद्री सतहबाट २‚१७३ मिटर उचाइमा छ। व्यवसायी ध्वजूका अनुसार सर्वोच्च शिखर सगरमाथासहित लामटाङ, दोर्जे लाक्पा, धौलागिरि, कञ्चनजंघा, मनास्लु, गणेश, गौरीशंकर, चोओयु, ल्होत्से, मकालुलगायत विश्वका उत्कृष्ट हिमशृङ्खला यहाँबाट देख्न सकिन्छ। नगरकोट क्षेत्र हिमालको काखबाट निस्कने सूर्योदयको दृश्यावलोकनका लागि पनि प्रसिद्ध मानिन्छ।

प्राकृतिक सौन्दर्य, हिमशृङ्खलाको मनोरम दृश्य, शान्त वातावरण, सूर्योदय-सूर्यास्तको अनुपम सौन्दर्य र सांस्कृतिक विविधताको सङ्गमका रूपमा परिचित छ। यहाँबाट लाङटाङ, गणेश, हिमालको दृश्यावलोकन गर्न सकिन्छ।

नगरकोट नाल्दुम पर्यटन विकास समिति अध्यक्ष नवीन गुरुङले एक दिनमा फरकफरक मौसमको अनुभूति गर्न पाइने नगरकोट हिमाली दृश्य, सूर्योदय र सूर्यास्तमात्रै नभई यहाँका हरियालीले भरिएको घना वनजङ्गल, पाखा-पखेरा, घाँसेमैदान र खुला प्राकृतिक वातावरणले पर्यापर्यटनमा समेत आकर्षण बढाएको बताए।

यहाँका गुरुङ, तामाङ, शेर्पालगायत जातिको स्थानीय संस्कृतिले पनि पर्यटकलाई सांस्कृतिक अनुभव दिनुका साथै आकर्षित गर्ने उनले बताए। यहाँका ट्रेकिङ मार्ग, साइकलिङ ट्रेल, घरबास, साहसिक खेललगायत विविध किसिमका पर्यटकलाई आकर्षित गर्ने गतिविधिका कारण बहुपक्षीय पर्यटकीय क्षेत्रका रूपमा विकसित हुँदै गएको उनले उल्लेख गरे।

‘नगरकोट भ्रमण वर्ष-२०८२’ ले नगरकोटलाई एक महत्त्वपूर्ण पर्यटकीय गन्तव्यका रूपमा राष्ट्रिय तथा अन्तर्राष्ट्रियस्तरमा चिनाउन ठूलो भूमिका खेलेको अध्यक्ष गुरुङले विश्वास व्यक्त गरे। उनले यीयस्ता विशेषताका कारण पर्यटकलाई नगरकोटतर्फ आकर्षित गर्नुका साथै स्थानीय व्यवसायीहरूलाई पनि उत्पादन र सेवा सुधार गर्ने अवसर प्रदान गरेको बताए।