काभ्रे। बसको ठक्करबाट काभ्रेको पाँचखालमा एक पैदलयात्रीको मत्यु भएको छ। अरनिको राजमार्गअन्तर्गत पाँचखाल नगरपालिका ४ मा सडकछेउमा पैदल हिँडिरहेका स्थानीय ६५ वर्षीय दिलबहादुर श्रेष्ठलाई बसले ठक्कर दिँदा उपचारका क्रममा मृत्यु भएको हो।

सिन्धुपाल्चोकको चौताराबाट काठमाडौँतर्फ आउँदै गरेको अरनिको यातायातको बा.२ख ६५७९ नम्बरको बसले पैदलयात्री श्रेष्ठलाई ठक्कर दिएको थियो। स्थानीय राजन कार्कीका अनुसार बिहान ८ बजे बसेले ठक्कर दिएपछि सख्त घाइते श्रेष्ठको उपचारका क्रममा १२ बजे धुलिखेल अस्पतालमा मृत्यु भएको छ।

प्रत्यक्षदर्शीका अनुसार सोही दिशाबाट अर्को बससँग ‘कम्पिटिसन’ गर्दै आएको उक्त बसले सडकछेउमा हिँडिरहेका श्रेष्ठलाई ठक्कर दिएर १० मिटर पर उछिट्याएको थियो।

यसैबीच उपचारका क्रममा श्रेष्ठको मृत्यु भएपछि उनका आफन्तले चालकलाई कारबाही तथा क्षतिपूर्तिको माग गर्दै अरनिको राजमार्ग अवरुद्ध गरेका छन्। घटनापछि चालक फरार भएपछि ठक्कर दिने बसलाई जिल्ला प्रहरी कार्यालय ल्याइएको छ। चालकको खोजी भइरहेको प्रहरीले जनाएको छ।