नुवाकोट। नेपाली कम्युनिस्ट पार्टीका संयोजक पुष्पकमल दाहालले देशमा जारी अस्थिर राजनीतिक परिवेशलाई निर्वाचनमार्फत समाधान गर्न सकिने बताएका छन्।

नुवाकोटको पञ्चकन्या गाउँपालिका ३ मा आज (आइतबार) घलेगाउँ सांस्कृतिक भवनको उद्घाटन गर्दै उनले नेपाली नागरिकको आत्मनिर्णयको अधिकार जोखिममा परेकाले त्यसको पुनःस्थापनाका लागि एकमात्र विकल्प निर्वाचन रहेको बताए। त्यसका लागि तोकिएको समयमा निर्वाचन गराउन राष्ट्रिय राजनीतिक एकताको आवश्यकता रहेको उनको भनाइ थियो।

“कम्युनिस्ट घटकमात्र होइन कांग्रेसलगायत सम्पूर्ण राजनीतिक शक्ति एकजुट भएर चुनाव सम्पन्न गर्न केन्द्रित हुनुपर्छ‚” संयोजक दाहालले भने, “फागुन २१ गते समयको अभावले चुनाव हुन नसक्ने भएमा आगामी वैशाखदेखि जेठ पहिलो सातासम्ममा ताजा जनादेश लिनुपर्छ। देशमा जारी अस्थिरतालाई निकास दिएर नयाँ गतिमा अघि बढ्नुपर्छ।”

चुनावका लागि नेपाली कांग्रेससहितका दल तयारीमा लागिसकेकाले नेकपा एमालेले पनि सहभागी हुने संयोजक दाहालले विश्वास व्यक्त गरे। “सबै शक्ति एकजुट भएर चुनावमा लाग्नुपर्छ यसमा नै सबैको भलो हुन्छ‚” संयोजक दाहालले भने।