काठमाडौँ। सञ्चार तथा सूचना प्रविधिमन्त्री जगदीश खरेलले शिक्षित नेपाल बनाउन र पठन संस्कृतिको विकास गर्न किताब जात्राको महत्त्वपूर्ण भूमिका रहेको बताएका छन्।

किताब जात्राको सातौँ संस्करणको बिहीबार उद्घाटन गर्दै उनले शिक्षित नेपाल निर्माणका लागि शिक्षामा सबैको पहुँच अभिवृद्धि गरिनुपर्नेमा जोड दिए। सञ्चारमन्त्री खरेलले सबै बालबालिकालाई गुणस्तरीय शिक्षाको सुनिश्चितताका लागि सरोकारवाला गम्भीर हुनुपर्ने उल्लेख गरे। उनले भने, “शिक्षाभन्दा संसारमा केही पनि छैन, शिक्षा नै अँध्यारो हटाउने ज्योति हो। त्यसैले शिक्षाबाट वञ्चित आज पनि जति बालबालिका छन् सबैले कामना गरौँ, सबै बालबालिका विद्यालय गएर राम्रोसँग अध्ययन गर्न पाउँछन्। सबैले चाहेअनुसारको शिक्षा हासिल गर्न सकून्।”

सरकारका प्रवक्तासमेत रहेका सञ्चारमन्त्री खरेलले सरकारले निर्धारित समयभित्रै निर्वाचन सम्पन्न गर्ने तथा जेन-जी आन्दोलनको भावनाअनुरुप सुशासन कायम र भ्रष्टाचार नियन्त्रणका लागि सरकार लागिपरेको उल्लेख गरे। उनले भने, “हामी अहिले संवदेनशील समयमा सरकारमा सहभागी भएका छौँ। मुलुकलाई एउटा परिवर्तनको बाटोमा अगाडि बढाउनुपर्ने जिम्मेवारी र दायित्व हामी सबैको काँधमा छ, यसलाई पूरा गर्न सबै लागौँ।”

किताब जात्राका निर्देशक ऋषिराज अधिकारीले पठनसंस्कृतिको विकाससँगै नागरिकलाई शिक्षाप्रति जागरण फैलाउने उद्देश्यले किताब जात्रा गरिँदै आएको बताए। दुईदिने कार्यक्रममा पुस्तक प्रदर्शनीका साथै विभिन्न प्राज्ञिक सत्र सञ्चालन हुने आयोजकले जनाएको छ। कार्यक्रममा कलाकारहरुले विभिन्न कला र संस्कृति झल्कने प्रस्तुति दिएका थिए।