कैलाली। लामो समयदेखि स्थगित सुदूरपश्चिम प्रदेशसभाको चालु अधिवेशनअन्तर्गतको बैठक यही ११ पुसमा बस्ने भएको छ।

आज बसेको प्रदेशसभा, कार्यव्यवस्था परामर्श समितिको बैठकमा सभामुख भीमबहादुर भण्डारीले ११ पुसमा प्रदेशसभाको बैठक बस्ने निर्णय भएको जानकारी दिए।

चालु बजेट अधिवेशनअन्तर्गतको पछिल्लो बैठक गत ५ भदौमा बसेको थियो। जेन-जी आन्दोलनका क्रममा २४ भदौमा प्रदेशसभा भवनमा आगजनी र तोडफोड भएपछि नियमित बैठक बस्न सकेको छैन। बैठक बस्न नसक्दा महत्त्वपूर्ण विधेयकमाथिको छलफलसमेत रोकिएको छ।

जेन-जी आन्दोलनका क्रममा प्रदेशसभा सचिवालय, संसदीय दलका कार्यालय, संसद् भवनमा गरी झन्डै आठ करोड रुपैयाँबराबरको क्षति पुगेको थियो।

प्रदेशसभा सचिवालयका सचिव देवबहादुर बोगटीले क्षति पुगेका संरचना मर्मत-सम्भारको काम अन्तिम चरणमा पुगेको र ११ पुसको दिउँसो २ बजे चालु बजेट अधिवेशनको बैठक बस्ने निर्णय भएको बताए।

उनले भने, “११ पुसमा बैठक बस्ने र लगत्तै चालु अधिवेशन अन्त्य गरेर हिउँदे अधिवेशन बोलाउने विषयमा सरकारसँग परामर्श भइरहेको छ। त्यसो हुन नसके चालु अधिवेशनका थप बैठक बस्नेछन्।”