काठमाडौं । नेपाली कांग्रेसका महामन्त्री गगन थापाले नेपाललाई कुशासन र भ्रष्टाचारबाट बाहिर निकाल्न कांग्रेस लाग्नुपर्ने बताएका छन् । सोमबार काठमाडौं क्षेत्र नम्बर ४ का मतदाता र कार्यकर्तालाई सम्बोधन गर्दै थापाले यस्तो बताएका हुन् ।

‘अब नेपाललाई कुशासन र भ्रष्टाचारबाट बाहिर निकाल्छु भनेर कांग्रेस लाग्नुपर्छ’, थापाले सम्बोधन गर्दै भने । उनले अहिलेसम्म भएका गल्तीप्रति सबैले क्षमा माग्नुपर्ने बताए ।

महामन्त्री थापाले आफू १५ औं महाधिवेशनको पार्टी सभापतिको उम्मेदवार भएकाले सबैले सहयोग गर्ने अपेक्षासमेत गरेको बताए । उनले पार्टी महाधिवेशन पार्टी नेतृत्व मात्र नभएर नयाँ पार्टी बनाउने कामसमेत भएको बताए । ‘म १५ औं महाधिवेशनको पार्टी सभापतिको उम्मेदवार हुँ । महाधिवेशन आन्तरिक कुरा मात्र होइन । अधिवेशन नेतृत्व नयाँ बनाउने कुरा मात्र होइन पार्टी नयाँ बनाउने काम पनि हो’, थापाले भने ।

अधिवेशन नगरेसम्म फागुन २१ को चुनावमा कांग्रेस पार्टी नजाने भएकाले नियमित महाधिवेशन नभए विशेष महाधिवेशनबाट समस्या समाधान हुने उनले प्रष्ट पारे । महामन्त्री थापाले यो महाधिवेशनमा दोस्रो चरणमा प्रवेश नगरी पहिलो चरणमै टुंग्याउने गरी सहयोग गर्नसमेत अपिल गरेका छन् ।

आफू पार्टी सभापतिको उम्मेदवार भएकाले आफ्नो क्षेत्र तागत बन्नुपर्नेमा उनले जोड दिएका छन् । काठमाडौं ४ बाट नै आफू केन्द्रीय सदस्यदेखि महामन्त्रीसम्म बन्दा यो क्षेत्र तागत बनेकाले अहिले यो क्षेत्रको सहयोग महत्त्वपूर्ण भएको प्रष्ट पारे ।

महामन्त्री थापाले संविधानलाई ट्याकमा ल्याउन फागुन २१ गते चुनाव आवश्यक भएकोमा जोड दिए । उनले चुनाव नभए मुलुक ठुलो अनिश्चिततामा जाने भन्दै सबैलाई चुनावमा लाग्नसमेत जोड दिए ।