काठमाडौं  । न्यूयोर्क सहरका मेयर जोहरान ममदानीले भेनेजुएलाका राष्ट्रपति निकोलस मादुरोलाई पक्राउ गर्न गरिएको अमेरिकी कारबाहीलाई कडा शब्दमा आलोचना गरेका छन्। उनले यस कदमलाई एक सार्वभौम राष्ट्रविरुद्ध गरिएको “युद्धसरहको कार्य” भन्दै राष्ट्रिय तथा अन्तर्राष्ट्रिय कानुनको उल्लंघन भएको बताएका छन्।

ममदानीका अनुसार मादुरो र उनकी पत्नीलाई न्यूयोर्कमा नियन्त्रणमा लिने योजनाबारे आफूलाई जानकारी दिइएको थियो। उनले कुनै स्वतन्त्र देशमाथि बल प्रयोग गरी शासन परिवर्तन गर्ने प्रयास गर्नु गम्भीर अन्तर्राष्ट्रिय अपराध भएको उल्लेख गरे।

उनको भनाइमा यस्तो हस्तक्षेप विदेशमै सीमित रहने छैन, यसको असर प्रत्यक्ष रूपमा न्यूयोर्क सहरमा पनि देखिन सक्छ। यही चिन्ताका कारण आफूले अमेरिकी राष्ट्रपति डोनाल्ड ट्रम्पलाई फोन गरेर प्रत्यक्ष रूपमा आपत्ति जनाएको उनले बताए।

“मैले राष्ट्रपतिसँग सिधै कुरा गरेर यो कदमको विरोध गरेँ,” ममदानीले भने, “यो स्पष्ट रूपमा शासन परिवर्तन गर्ने प्रयास हो र संघीय तथा अन्तर्राष्ट्रिय कानुनको उल्लंघन हो।”

पछि सामाजिक सञ्जालमार्फत प्रतिक्रिया दिँदै उनले यस्ता गतिविधिले न्यूयोर्कमा बसोबास गर्ने न्यूयोर्कवासी तथा भेनेजुएलाली समुदायको सुरक्षामा असर पार्न सक्ने चेतावनी दिए। उनले आफ्नो प्रशासनले परिस्थितिको निरन्तर निगरानी गर्ने र आवश्यक निर्देशन जारी गर्ने स्पष्ट पारे।

अमेरिकी राष्ट्रपति ट्रम्पको आदेशपछि शनिबार भएको “ठूलो स्तरको सैन्य कारबाही” पश्चात् मादुरोलाई उनकी पत्नी सिलिया फ्लोरेससहित पक्राउ गरिएको जनाइएको छ। उनलाई हेलिकप्टरमार्फत म्यानहट्टनबाट ब्रुकलिनस्थित मेट्रोपोलिटन डिटेन्सन सेन्टरमा सारिने बताइएको छ।

मादुरोलाई लागूऔषध तथा हतियारसम्बन्धी अभियोगमा म्यानहट्टनको संघीय अदालतमा पेश गरिने तयारी छ। उता भेनेजुएला सरकारले भने यो कारबाही आफ्नो देशको तेल तथा खनिज स्रोत कब्जा गर्ने उद्देश्यले गरिएको आरोप लगाएको छ।