काठमाडौँ। पूर्वप्रधानमन्त्री तथा नेकपा एमाले अध्यक्ष केपी ओलीमाथि लगाइएको स्थानहद फुकुवा गरिएको छ।

गत २३ र २४ भदौको घटनासम्बन्धी छानबिन गर्न गठित जाँजबुझ आयोगले ओलीमाथि लगाइएको विदेश भ्रमणमा रोक लगाउने र स्वीकृतबेगर काठमाडौँ उपत्यका छाड्न नपाउने व्यवस्था हटाएको हो।

आयोगको आज (सोमबार) बसेको बैठकले ओलीको स्थानहद हटाउने निर्णय गरेको हो। आयोगका सदस्य एवं प्रवक्ता विज्ञानराज शर्माले उक्त घटनाका सम्बन्धमा प्रधानमन्त्रीको हैसियतले ओलीले गरेका काम-कारबाही सम्बन्धमा सोधपुछ गर्ने काम सम्पन्न भएकाले स्थानहद फुकुवा गरिएको जानकारी दिए।

“२३ र २४ भदौका घटनाको छानबिन तथा जाँचबुझको सिलसिलामा अनुसन्धानको दायरामा रहनुभएका तत्कालीन प्रधानमन्त्री केपी ओलीलाई विदेश भ्रमणमा रोक लगाउने र आयोगको स्वीकृति बेगर काठमाडौँ उपत्यका छाड्न नपाउने व्यवस्था गर्न १२ असोजको बैठकबाट निर्णय गरिएको थियो‚” आयोगको निर्णयमा भनिएको छ, “ती घटनाका सम्बन्धमा प्रधानमन्त्रीको हैसियतले उहाँले गरेका काम-कारबाही सम्बन्धमा यस आयोगबाट उहाँसँग सोधपुछलगायत बुझ्ने कार्य सम्पन्न भइसकेकाले उहाँको विदेश भ्रमण र उपत्यका छाड्न नपाउने निर्णयको औचित्य समाप्त भएकाले फुकुवा गरिएको छ।”

आयोगको टोलीले बयान लिने क्रममा आइतबार गुन्डुस्थित अध्यक्ष ओलीको निवासमा पुगेको थियो। आयोगको टोलीलाई ओलीले लिखित जवाफ बुझाएका थिए।

यसअघि आयोगले तत्कालीन गृहमन्त्री रमेश लेखकसँग बयान लिइसकेको छ। प्रवक्ता शर्माका अनुसार चार सुरक्षा निकायका प्रमुखसँग, जिल्ला प्रशासन कार्यालयका प्रमुखलगायत व्यक्तिसँग बयान लिने काम गरिसकेको छ।

“बयान लिने काम लगभग सकियो, आयोगले तीव्र रुपमा काम गरिरहेको छ‚” प्रवक्ता शर्माले भने, “जेनजी आन्दोलनमा प्रत्यक्ष सरोकार भएका र अन्य सम्बन्धित व्यक्तिहरुसँग भेटेर विवरण लिने काम भएको छ।” आयोगको कार्यदेशअनुसार तीन महिनाको अवधि सकिएपछि एक महिनाका लागि थप गरिएको छ।