चितवन। राष्ट्रिय स्वतन्त्र पार्टी (रास्वपा) का सभापति रवि लामिछानेले निर्वाचनको समयमा रास्वपा नेता तथा कार्यक्रताहरु संयमित भएर प्रस्तुत हुन जरुरी रहेको बताएका छन्।

रास्वपा पार्टी कार्यालय भरतपुरमा आज (बिहीबार) आयोजित कार्यकर्ता भेटघाट तथा पार्टी प्रवेश कार्यक्रममा उनले रास्वपाका नेता कार्यकर्ता जिम्मेवार भएर प्रस्तुत हुन जरुरी रहेको बताए।

उनले भने, “रास्वपालाई एउटा आरोप छ। रास्वपाका समर्थकहरू गाली गलोज गर्छन्। त्यसबाट माथि उठेर सु-संस्कृत बन्नुपर्नेछ।” अहिले सुजबुझका साथ अघि बढ्नुपर्ने समय आएको उनको भनाइ थियो। उनले निर्वाचन लोकतन्त्रको सबैभन्दा सुन्दर पक्ष भन्दै निर्वाचनको विकल्प निर्वाचन नै भएको बताए।

“चुनाव बिथोल्ने कुरा बन्द गर्नुहोला। बेथितिको अध्याय अन्त्य गर्ने सबैभन्दा उत्तम उपाय निर्वाचन नै हो। चुनाव बिथोल्ने काम कही कतैबाट नगर्नुहोला‚” उनले भने।

रास्वपाले राजनीतिक प्रतिशोधको राजनीति नगर्ने बताउँदै उनले सबैप्रति जिम्मेवार हुन कार्यकर्तालाई आग्रह गरे। सिंगो देश र पुस्ताको सपना पूरा गर्न रास्वपा बलियो बन्न आवश्यक रहेको उनको भनाइ थियो। व्यक्तिगत स्वार्थभन्दा माथि देश र जनताको स्वार्थलाई राखेर उम्मेदवार छनोट गर्ने क्रममा आफूहरु रहेको उनले बताए।