काठमाडौँ। नेपाली कांग्रेस विशेष महाधिवेशन पक्षधरको आह्वानमा सोमबारदेखि सुरु भएको बन्दसत्रमा पार्टीका महामन्त्रीद्वय गगनकुमार थापा र विश्वप्रकाश शर्माले पेस गरेका प्रस्ताव पारित भएका छन्।

सोमबारको बन्दसत्रमा महामन्त्री थापाले राखेको समसामयिक राजनीतिक प्रस्ताव र शर्माले राखेको पार्टीको साङ्गठनिक प्रस्ताव आज (मंगलबार) को बन्दसत्रले पारित गरेको हो।

सोमबारदेखि सुरु भएको बन्दसत्रमा सात प्रदेश, उपत्यका र भ्रातृ, शुभेच्छुक एवं जनसम्पर्क समितिका छुट्टाछुट्टै नौ समूह बनाएर गहन छलफल गरी पारित गरिएको हो।

यस्तै आजै दिउँसोदेखि निर्वाचनका कामलाई समेत अगाडि बढाइएको छ। आज उम्मेदवारी दर्ता गरी भोलि (बुधबार) मतदान गर्ने कार्यक्रम रहेको निर्वाचन समितिका संयोजक सीताराम केसीले जानकारी दिए।