काठमाडौँ। नेपाली कांग्रेसको दोस्रो महाधिवेशनबाट नवनिर्वाचित गगनकुमार थापा नेतृत्वको केन्द्रीय कार्यसमितिले विवरण अद्यावधिकका लागि निर्वाचन आयोगमा विवरण पेस गरेको छ।

सभापति थापाको नेतृत्वमा नवनिर्वाचित केन्द्रीय पदाधिकारी र केन्द्रीय सदस्यहरू आज (बिहीबार) आयोगको केन्द्रीय कार्यालय पुगेर राजनीतिक दलसम्बन्धी ऐन, २०७३ को दफा ५१ बमोजिम केन्द्रीय कार्य समितिका पदाधिकारी हेरफेर भएको विवरण पेस गरेका हुन्।

विवरण पेस गर्दै सभापति थापाले विशेष महाधिवेशनले गरेका निर्णय, पारित गरेका दस्ताबेज र नवनिर्वाचित केन्द्रीय कार्यसमितिको विवरण पेस गरिएको सञ्चारकर्मीलाई जानकारी दिए। विशेष महाधिवेशनले सभापतिसहित सिङ्गो केन्द्रीय कार्यसमिति नै परिवर्तन गरिएको विवरण पेस गरिएको उनले बताए।

विवरण बुझाएपछि सञ्चारकर्मीसँग कुरा गर्दै थापा नेतृत्वको नेपाली कांग्रेसका उपसभापति विश्वप्रकाश शर्माले पार्टी फुटेको नभई विधानअनुसार विधिवत् भएको विशेष महाधिवेशनले नयाँ केन्द्रीय कार्यसमिति सर्वसम्मत रूपमा निर्वाचित गरेको जानकारी दिए। त्यही विवरण अद्यावधिक गर्न पार्टी केन्द्रीय कार्यसमितिका पदाधिकारी र केन्द्रीय सदस्यहरू आयोग आएको उनले सुनाए।

थापा नेतृत्वको नेपाली कांग्रेसका नवनिर्वाचित महामन्त्री गुरुराज घिमिरेले आयोग आउनुअघि बसेको केन्द्रीय कार्यसमितिको बैठकले आगामी २१ फागुनमा हुने निर्वाचनमा टिकट वितरण गर्ने प्रयोजनका लागि संसदीय समिति एवं बोर्ड गठन गर्ने निर्णय भएको बताए। निर्वाचनका लागि पार्टीको घोषणापत्र मस्यौदा गर्न सभापति थापाको नेतृत्वमा अर्को समिति गठन भएको उनले बताए।

नवनिर्वाचित केन्द्रीय समितिले वरिष्ठ अधिवक्ता हरिहर दाहाल, वरिष्ठ अधिवक्ता एवं नेपाल बार एसोसिएसनका पूर्वअध्यक्ष गोपालकृष्ण घिमिरे, वरिष्ठ अधिवक्ता एवं एसोसिएसनका अर्का पूर्वअध्यक्ष प्रेमबहादुर खड्कासहितका कानुन व्यवसायी लिएर आयोगमा आएको थियो। सभापति थापाले आयोगका कार्यवाहक प्रमुख आयुक्त रामप्रसाद भण्डारीलाई दोस्रो विशेष महाधिवेशनबाट पारित भएका नीति तथा कार्यक्रमलगायत दस्ताबेज र नवनिर्वाचित केन्द्रीय कार्यसमितिको विवरणलगायत कागजात पेस गरेका थिए।

थापा नेतृत्वको नेपाली कांग्रेसले छिटो विवरण अद्यावधिक गर्न माग गरेको छ। आयोग परिसरमा सञ्चारकर्मीसँग कुरा गर्दै थापा नेतृत्वको कांग्रेसका नवनिर्वाचित पदाधिकारी एवं केन्द्रीय सदस्यहरूले आगामी २१ फागुनमा हुने निर्वाचनका लागि मनोनयन दर्ता गर्ने समयनजिक आएकाले छिटो केन्द्रीय पदाधिकारीसहित केन्द्रीय सदस्यको विवरण अद्यावधिक गर्न माग गरेका हुन्। आयोगले सार्वजनिक गरेको निर्वाचन कार्यतालिकाअनुसार प्रत्यक्ष निर्वाचन हुने १६५ क्षेत्रका लागि ६ माघमा मनोनयनपत्र दर्ता गर्ने कार्यक्रम छ।