काठमाडौँ। ट्रम्प प्रशासनले गाजामा शान्तिप्रक्रियाका लागि समितिहरू घोषणा गर्न थालेको छ। यद्यपि यसको इजरायल र प्यालेस्टिनी दुवैले आलोचना गरेका छन्।

प्यालेस्टिनीहरूले प्यालेस्टिनी प्रतिनिधिहरूलाई समावेश नगरेको मुद्दा उठाएका छन्। प्यालेस्टिनी नेता मुस्तफा बर्घौतीले बीबीसीलाई भनेका छन्‚ “यो केही अन्तर्राष्ट्रिय सदस्यहरूसहितको अमेरिकी बोर्डजस्तो देखिन्छ।”

इजरायलले यी समितिहरूमध्ये गाजा कार्यकारी बोर्डमा नियुक्तिबारे परामर्श नगरिएकामा दु:ख जनाएको छ।

इजरायली प्रधानमन्त्री बेन्जामिन नेतान्याहुले गाजा शान्तिप्रक्रियाका लागि राष्ट्रपति डोनाल्ड ट्रम्पको प्यानलमा नियुक्तिहरूबारे छलफल गर्न आफ्नो मन्त्रिपरिषद्सँग भेट गर्दै छन्।

ट्रम्प प्रशासनको नयाँ ‘शान्ति बोर्ड’ मा नियुक्तिहरूमा ट्रम्पका ज्वाइँ जारेड कुशनर, ट्रम्पका दूत स्टिभ विटकोफ, अमेरिकी विदेशमन्त्री मार्को रुबियो र पूर्वबेलायती प्रधानमन्त्री टोनी ब्लेयर समावेश छन्।

पछि टर्की, इजिप्ट र अर्जेन्टिनाका राष्ट्रपतिहरूले भने कि उनीहरूलाई पनि उपस्थित हुन आमन्त्रित गरिएको थियो।