अमेरिका । अमेरिकाको मिनेसोटा राज्यस्थित मिनियापोलिस शहर संघीय आप्रवासन अधिकारीको कारबाहीपछि फेरि तनावग्रस्त बनेको छ। शनिबार बिहान गरिएको एक अपरेशनका क्रममा संघीय अधिकारीको गोलीबाट ३७ वर्षीय अमेरिकी नागरिक एलेक्स प्रेट्टीको मृत्यु भएपछि शहरभर विरोध प्रदर्शन फैलिएको हो।

स्थानीय परिवारजन र सञ्चारमाध्यमका अनुसार प्रेट्टी मिनियापोलिसका स्थायी बासिन्दा थिए। उनी संघीय अधिकारीद्वारा घेरिनुका क्रममा मोबाइल फोनमार्फत भिडियो खिचिरहेका थिए। घटनास्थलबाट सार्वजनिक भएका भिडियो तथा प्रत्यक्षदर्शीका बयानमा प्रेट्टीको हातमा हतियार नभई मोबाइल मात्र देखिएको उल्लेख गरिएको छ।

तर अमेरिकी गृह सुरक्षा विभागले भने प्रेट्टीसँग हतियार रहेको दाबी गर्दै आफूहरूलाई जोगाउन गोली चलाउनुपरेको जनाएको छ। यद्यपि स्थानीय अधिकारी र बाहिर आएका भिडियो प्रमाणहरूले संघीय अधिकारीको उक्त दाबीमाथि गम्भीर प्रश्न उठाएको अमेरिकी सञ्चारमाध्यमहरूले जनाएका छन्।

यो घटना यसै महिनामा संघीय आप्रवासन अधिकारीद्वारा भएको दोस्रो घातक गोलीकाण्ड हो। केही हप्ताअघि पनि मिनियापोलिसमै रेनी गुड नामका अर्का अमेरिकी नागरिकको यस्तै कारबाहीमा ज्यान गएको थियो, जसपछि ठूलो स्तरको विरोध प्रदर्शन भएको थियो।

मिनेसोटाका गभर्नर टिम वाल्ज र मिनियापोलिसका मेयरले संघीय अधिकारीको कार्यशैलीप्रति कडा असन्तुष्टि व्यक्त गर्दै यसलाई अत्यधिक बल प्रयोग र स्थानीय कानुनको उल्लङ्घन भनेका छन्।

घटनापछि हजारौँ प्रदर्शनकारी सडकमा उत्रिएका छन्। कतिपय स्थानमा प्रदर्शनकारी र सुरक्षाकर्मीबीच झडप भएको, अश्रुग्यास प्रयोग गरिएको र केहीलाई नियन्त्रणमा लिइएको समाचार एजेन्सीहरूले जनाएका छन्।