काबुल। अफगानिस्तानको दक्षिणी प्रान्त कन्दाहरमा शनिबार एउटा घरको छाना खस्दा चार जनाको मृत्यु भएको छ।
स्थानीय अधिकारी अब्दुल सलाम ओमरका अनुसार मृतक सबै एउटै परिवारका सदस्य हुन्। घटनामा तीन बालबालिका र एक वृद्ध पुरुषको ज्यान गएको बताइएको छ। घटनाका थप विवरण भने सार्वजनिक गरेका छैनन्।
घटना बिहीबार पूर्वी अफगानिस्तानको नंगरहार प्रान्तको राजधानी जलालाबादमा भएको उस्तै घटनापछि दोहोरिएको हो। जलालाबादमा पनि घरको छाना खस्दा सातजनाको मृत्यु भएको र एकजना घाइते भएका थिए। यी लगातार भएका घटनाले अफगानिस्तानमा पुराना घरहरूमा संरचनागत कमजोरी र जोखिमको अवस्था उजागर गरेका छन्।
विशेषगरी ग्रामीण र सुदूर क्षेत्रमा पुराना घरहरू पर्याप्त सुरक्षा मापदण्ड नअपनाउँदा यस्तो प्रकारका घटनाहरू बारम्बार हुने गरेको देखिएको छ। अधिकारीहरूले स्थानीय बासिन्दालाई आफ्नो घरको निरीक्षण र आवश्यक मर्मत गर्न सचेत रहन आग्रह गरेका छन्।
विशेषज्ञहरूले भने घरहरूको ढाँचा बलियो बनाउन र आधुनिक निर्माण मापदण्ड अपनाउन स्थानीय प्रशासनसँग मिलेर काम गर्नुपर्ने सुझाव दिएका छन्। यसरी तत्काल कदम चाल्न नसक्दा भविष्यमा यस्ता दुर्घटना दोहोरिन सक्ने चेतावनी दिइएको छ। -रासस/सिन्ह्वा
