झापा। नेपाली कांग्रेसका उपसभापति विश्वप्रकाश शर्माले २१ फागुनअघि विघटित संसद्को पुनःस्थापना नहुने बताएका छन्।

नेपाली कांग्रेस झापा निर्वाचन क्षेत्र नम्बर २ को आयोजनामा आज (सोमबार) बिर्तामोडमा आयोजित कार्यकर्ता भेलामा उनले २१ फागुनमा हुने चुनावमा पूर्णशक्तिका साथ होमिन पार्टी पङ्क्तिलाई आग्रह गरे। “विघटित संसद् पुनःस्थापना हुँदैन‚” उनले भने‚ “अदालती सुनुवाइ प्रक्रिया लामो हुन्छ। त्यसैले तोकिएको मिति फागुन २१ मा चुनाव हुन्छ।”

उनले पार्टीको नेतृत्व बदलेको कांग्रेस अब देशको मुहार बदल्ने अभियानमा होमिएको जनाउँदै विशेष महाधिवेशनमार्फत नेतृत्वमा युवालाई निर्वाचित गरेर कांग्रेस नवीन पार्टी बनेको बताए।

उपसभापति शर्माले पार्टीका नेता तथा कार्यकर्तालाई आगामी १ देखि २१ फागुनसम्म आफ्नो निर्वाचन क्षेत्र नछाडी पार्टीका उम्मेदवारको पक्षमा मत माग्न निर्देशन दिए। पार्टीले यसपटक १०६ वटा निर्वाचन क्षेत्रमा नयाँ अनुहारलाई उम्मेदवार बनाएको पनि उनको भनाइ छ।

जेन-जी आन्दोलनको माग सम्बोधन गर्ने सामर्थ्य नेपाली कांग्रेसमा रहेको धारणा व्यक्त गर्दै उनले पार्टी बदलेर अब देश बदल्ने संकल्पका साथ आफूहरू लागिरहेको बताए। जेन-जी आन्दोलनपछि टुटेको जनविश्वासलाई जोड्ने तागत कांग्रेससँग रहेको जनाउँदै उनले विशेष महाधिवेशनपछि पार्टी एकढिक्का भएको बताए।