गुवाहाटी। मेघालयको पूर्वी जयन्तिया हिल्स जिल्लामा रहेको अवैध कोइलाखानीमा भएको विस्फोटमा मृत्यु हुनेको संख्या २५ पुगेको छ।
पूर्वी जयन्तिया हिल्स जिल्लाका प्रहरी उपरीक्षक विकास कुमारले बीबीसी न्यूज हिन्दीलाई प्रतिक्रिया दिएका छन्‚ “उद्धार टोलीले अपरेसनका क्रममा खानीबाट थप चार शव बरामद गरेको छ। थाङ्स्को क्षेत्रको मिन्सिङगाटमा भएको खानी घटनाको सम्बन्धमा आज खोजी र उद्धार कार्य जारी छ।”
मेघालयको उम्प्लेङ प्रहरी चौकीको क्षेत्राधिकारमा रहेको अवैध कोइला खानीमा बिहीबार बिहान एक शंकास्पद डाइनामाइट विस्फोट भएको थियो। रिपोर्टका अनुसार त्यहाँ धेरै मजदुर काम गरिरहेका थिए।
प्रहरी उपरीक्षक विकास कुमारले घटनामा सख्त घाइते भएका तीन कामदारको मृत्यु भएको बताए।
उनले भने‚ “यस घटनामा मृत्यु हुनेको संख्या २५ पुगेको छ। अहिलेसम्म बरामद गरिएका शवमध्ये १७ जनाको पहिचान गरी सबै आवश्यक कानुनी औपचारिकता पूरा गरेपछि आफन्तहरूलाई हस्तान्तरण गरिएको छ।”
घटनाका सम्बन्धमा खलीहरियात प्रहरी चौकीमा एफआईआर दर्ता गरिएको छ।
भारतीय दण्ड संहिताको धारा १०५ (हत्या नभई अपराधपूर्ण हत्या)‚ ११८(२) (खतरनाक माध्यमबाट गम्भीर चोट पुर्याउने)‚ ३(५) (साझा मनसाय भएका धेरै व्यक्तिद्वारा अपराध गर्ने)‚ साथै खानी तथा खनिज (विकास र नियमन) ऐनको धारा २१/२१(१) (अवैध खानी‚ ढुवानी र भण्डारण) र विस्फोटक पदार्थ ऐनको धारा ३ (जीवन वा सम्पत्तिलाई खतरामा पार्ने विस्फोट गराउने) अन्तर्गत एफआईआर दर्ता गरिएको छ।
प्रहरीले पक्राउ गरेका दुई खानी मालिकको पहिचान फोर्मे चिरमाङ र शमेही वारका रूपमा गरिएको छ। दुवै अभियुक्तलाई तीन दिनका लागि प्रहरी हिरासतमा राखिएको छ।
राष्ट्रिय विपद् प्रतिक्रिया बल‚ राज्य विपद् प्रतिक्रिया बल र विशेष उद्धार एकाइका टोलीहरूले घटनास्थलमा उद्धार र खोजी कार्य गरिरहेका छन्।
एसपीले भने‚ “खोज अभियान अझै जारी छ। बाँकी पीडितलाई सकेसम्म चाँडो पत्ता लगाउन र पहिचान गर्न सबै प्रयासहरू भइरहेका छन्।”
