काठमाडौं। राष्ट्रिय स्वतन्त्र पार्टी (रास्वपा) मकवानपुरका संस्थापक सभापति भरतप्रसाद पराजुलीले पनि पार्टी परित्याग गरेका छन्। रास्वपा जानुअघि कांग्रेसमा रहेका पराजुली पुनः कांग्रेसमै फर्किएका हुन्।

सर्लाहीमा कांग्रेस सभापति गगनकुमार थापाले पराजुलीलाई सोमबार पार्टीमा स्वागत गरे।

पराजुली २०७९ को प्रतिनिधिसभा निर्वाचनमा मकवानपुर २ बाट उम्मेदवार बनेका थिए। मकवानपुरको मनहरि गाउँपालिकाका पराजुलीले मकवानपुरको पश्चिम क्षेत्रमा राम्रो पकड भएका नेता मानिन्छन्। प्रतिनिधिसभा निर्वाचनमा रास्वपाबाट टिकटको प्रमुख दाबेदार रहे पनि पछि आएकालाई टिकट दिएपछि पराजुली असन्तुष्ट बनेका थिए।

कांग्रेस प्रवेश गरेपछि पराजुलीले रास्वपामा बसेर सच्चा राजनीति गर्न नसकिने देखिएकाले कांग्रेसमा फर्किएको बताए। उनले भने, “रास्वपाको संगठन विस्तारमा धेरै दुःख गरेँ। तर त्यो पार्टी दुःख गर्नेका लागि होइन रहेछ। पुँजीवादी सोच भएको पार्टीमा बस्न मन नलागेर कांग्रेसमा फर्किएँ।”