काठमाडौं । नेपाली कांग्रेसका सभापति गगन कुमार थापाले धादिङमा गएराति भएको दुर्घटनाको खबरले आफू मर्माहत भएको बताएका छन् ।

थापाले सामाजिक सञ्जाल फेसबुकमार्फत घटनामा ज्यान गुमाएकाहरुको आत्माको चीरशान्तिको कामना गर्दै शोक सन्तप्त परिवारजनमा समवेदना प्रकट गरेका छन् । उनले घटनामा घाइते भएकाहरुको शीघ्र स्वास्थ्य लाभको कामना गरेका छन् ।

पृथ्वी राजमार्ग अन्तर्गत धादिङको बेनिघाट रोराङ गाउँपालिका–७ चरौँदी नजिकै गएराति यात्रुवाहक बस दुर्घटना हुँदा १८ जनाको मृत्यु भएको छ। घटनामा २६ जना घाइते भएका छन् ।

पोखराबाट काठमाडौं आउँदै गरेको ग२ ख १४२१ नम्बरको बस त्रिशूली नदी किनारमा खसेको थियो।

पोखरादेखि बस छुट्दा चालक, कर्मचारीसहित बसमा ३७ जना सवार थिए । बीच बाटोमा अन्य यात्रु पनि चढेको अनुमान गरिएको छ ।