गोरखा। गोरखा क्षेत्र नम्बर १ अन्तर्गत उत्तरी गोरखाको चुमनुब्री गाउँपालिकाका सबै मतपेटिका आज सदरमुकाम ल्याइएका छन्। बिहान नेपाली सेनाको हेलिकोप्टरमार्फत बाँकी १४ वटा मतदान केन्द्रका मतपेटिका पनि सदरमुकाम ल्याइपुर्‍याइएको गोरखाका सहायक प्रमुख जिल्ला अधिकारी नेत्रप्रसाद शर्माले जानकारी दिए।

चुमनुब्री गाउँपालिका-२ ल्हो, वडा नं ३ सिर्दिबास, वडा नं ४ प्रोक र वडा नं ५ बिहीको मतपेटिका बिहान ल्याइएका हुन्। भौगोलिक विकटताका कारण चुमनुब्रीका २३ वटा मतदान केन्द्रको मतपेटिका हेलिकोप्टरबाट ल्याउनुपर्ने बाध्यता थियो। “हिजो नै मतपेटिका ल्याउने तयारी भए पनि मौसम खराबीका कारण सकिएको थिएन,” उनले भने, “आज बिहान मौसम खुलेसँगै सेनाको हेलिकोप्टरले बाँकी रहेका सबै मतपेटिका सदरमुकाम ल्याएको हो।”

यसअघि शुक्रबार सेनाको हेलिकोप्टरले नौ वटा मतदान केन्द्रको मतपेटिका ल्याएको थियो। गोरखा १ को मतपेटिका संकलनको काम सम्पन्न भएसँगै आज नै मतगणना अगाडि बढाउने तयारी भएको शर्माले बताए।