जनकपुरधाम। यहाँस्थित आन्तरिक राजस्व कार्यालयले चालु आर्थिक वर्षको प्रथम नौ महिनामा तीन अर्ब ९७ करोड ६७ लाख चार हजार रुपैयाँ राजस्व संकलन गरेको छ।
चालु आवको नौ महिनामा चार अर्ब ३३ करोड ८२ लाख ७७ हजार रुपैयाँ संकलन गर्ने लक्ष्य रहेकामा तीन अर्ब ९७ करोड ६७ लाख चार हजार रुपैयाँ संकलन भएको उक्त कार्यालयका प्रमुख आनन्दकुमार गुप्ताले जानकारी दिए।
हालसम्म आयकरवापत एक अर्ब १४ करोड ९४ लाख ५२ हजार रुपैयाँ, बहालकरवापत तीन करोड १८ लाख ९९ हजार रुपैयाँ, व्याजकरवापत छ करोड १७ लाख ८५ हजार रुपैयाँ, मुल्य अभिवृद्धिकरवापत ८१ करोड ९४ लाख २० हजार रुपैयाँ, अन्तःशुल्कवापत एक अर्ब ८८ करोड ८५ लाख ७१ हजार रुपैयाँ, स्वास्थ्य सेवाकरवापत तीन लाख १० हजार रुपैयाँ, शिक्षाकरवापत एक हजार तथा अन्य वापत दुई करोड ५२ लाख ६६ हजार रुपैयाँ गरी कुल तीन अर्ब ९७ करोड ६७ लाख चार हजार रुपैयाँ राजस्व संकलन भएको कार्यालय प्रमुख आनन्दकुमार गुप्ताले जानकारी दिए।
यसैबीच, समयमा राजस्व दाखिला नगर्ने १२५ व्यावसायिक ‘फर्म’लाई कारबाही प्रक्रिया बढाएइएको जानकारी दिँदै कार्यालय प्रमुख गुप्ताले कारबाहीको सूचना सार्वजनिक भएपछि १० वटा व्यावसायिक फर्मले चार करोड ३० लाख दाखिला गरेका बताए।
आन्तरिक राजस्व कार्यालयमा एक लाख ६६ हजार ६५२ करदाता दर्ता छन्।
