दोलखा– जिल्लाको जिरी नगरपालिका–४ मा जिरेल महिला समूहका ११ जना महिलाको सहभागितामा सञ्चालन भएको नौमती बाजा बजाउने दोस्रो चरणको तालिम सम्पन्न भएको छ।
१० दिनसम्म सञ्चालन भएको तालिममा सहभागी महिलाहरूले अघिल्लो चरणमा सिकेको आधारभूत सीपलाई थप परिष्कृत गर्दै व्यावहारिक अभ्यास गरेका थिए। तालिमको समापन समारोहलाई सम्बोधन गर्दै नगरपालिकाकी प्रमुख प्रशासकीय अधिकृत राजकुमारी खत्रीले तालिमबाट प्राप्त ज्ञान र सीपलाई व्यवहारमा उतार्दै आयआर्जन तथा सामाजिक गतिविधिमा उपयोग गर्न आग्रह गरिन ।
वडा अध्यक्ष पदेमान जिरेलको अध्यक्षतामा आयोजित तालिम समापन कार्यक्रममा उनले वडा तथा नगरले दिने यस्ता तालिमले महिलाहरूको आत्मविश्वास वृद्धि गर्नुका साथै स्थानीय कला र संस्कृतिको संरक्षणमा महत्वपूर्ण योगदान पुर्याउने उल्लेख गरिन।
तालिम समापन तथा प्रमाणपत्र वितरण गर्दै नगर प्रमुख मित्र जिरेलले स्थानीय कला, संस्कृति तथा परम्परागत बाजाको संरक्षण र प्रवर्द्धनमा महिलाहरूको भूमिका महत्वपूर्ण रहेको बताए। उनले नौमती बाजा जस्ता मौलिक सांस्कृतिक सम्पदाको संरक्षणका लागि नगरपालिका निरन्तर लागिपर्ने प्रतिबद्धता व्यक्त गरे।
जिरेल महिला समूहकी अध्यक्ष सिर्जना जिरेलको नेतृत्वमा सञ्चालन भएको उक्त तालिमले महिलाहरूको क्षमता अभिवृद्धिसँगै सांस्कृतिक सम्पदाको संरक्षणमा समेत टेवा पुग्ने विश्वास गरिएको छ।
