किमाथांका। शुक्रबार, शनिबार र आइतबारको अविरल वर्षापछि आएको बाढीपहिरोले विभिन्न स्थानमा क्षति पुर्याएको छ। पहिराले खाँदबारीस्थित कारागारको भवन उच्च जोखिममा परेको छ।
शनिबार दिउँसो आएको अविरल वर्षाले जिल्ला कारागार खाँदबारीको ३० मिटरको बाहिरी पर्खाल भत्किएको जेलर राजन घिमिरेले जानकारी दिए। पहिरोले कारागारको तल्लो भागको बाहिरी पर्खाल भत्किएर तलदेखि पहिरोले जोखिम बनाएको उनले बताए।
पहिरो रोकथामका लागि आइतबारदेखि मर्मत थालिए पनि वर्षाका कारण समस्या भएको उनको भनाइ छ। पहिरोका कारण सदरमुकाम खाँदबारीमा रहेको नेपाली सेनाको इन्द्रदल गुल्मसमेत जोखिममा परेको जनाइएको छ। पहिरोका कारण चैनपुर नगरपालिका-६ मा रहेको १५ शय्याको नगर अस्पताल पर्खाल भत्किएर जोखिममा परेको जिल्ला प्रहरी कार्यालय संखुवासभाका निमित्त प्रहरी प्रमुख प्रहरी निरीक्षक रामकुमार लामिछानेले जानकारी दिए।
त्यसैगरी, चैनपुर-३ सिद्धपोखरीमा एक घर पहिरोको जोखिममा परेको छ। आइतबार दिउँसो आएको वर्षाका कारण ढुंगामाटोले बनेको तेञ्जी शेर्पाको घर पहिरोको उच्च जोखिममा परेको उनले बताए। उनको परिवारलाई अन्यत्र सारिएको छ।
भोटखोला सडक अवरुद्ध
पहिरोका कारण सदरमुकाम खाँदबारीबाट भोटखोला गाउँपालिका जाने उत्तर-दक्षिण सडकखण्ड एक महिनादेखि अवरुद्ध छ। उत्तर-दक्षिण सडक खण्डको मकालु गाउँपालिका-३ मा पहिरो खसेपछि सडक अवरुद्ध भएको हो। सडक अवरुद्ध भएपछि भोटखोला गाउँपालिकासँगसम्बन्ध सम्पर्क टुटेको छ।
त्यसैगरी पहिरोका कारण उत्तर–दक्षिण कोसी सडकखण्डका केही स्थानमा अझै अवरोध रहेका कारण जिल्लाबाहिर जाने लामो दुरीका यातायात सञ्चालनमा रोक लगाइएको छ।
माथिल्लो क्षेत्रमा लगातार ठूलो वर्षा भइरहेको र अरुण नदीको जलसतहले खतराको तह पार गरेको र अझै बढ्ने खतरा भएका कारण जिल्ला बाहिर तथा जिल्लाभित्रका ग्रामीण सडकखण्डमा यातायात सञ्चालनमा रोक लगाइएको निमित्त प्रहरी प्रमुख लामिछानले जानकारी दिए।
