उत्तरगया गाउँपालिकाका अध्यक्ष माधव अर्यालले बाँकी भूकम्प विस्थापितहरूको पुनःस्थापनाका लागि ११ करोड रुपैयाँ लाग्न सक्ने बताए। खाल्टे र पैरेबेँसीमा भूकम्पपीडित ८६ परिवारलाई जग्गा खरिद गर्नका लागि सात करोड ३१ लाख रुपैयाँ विनियोजन गरिएको छ। भवन निर्माणका लागि ३ करोड रुपैयाँ छुट्याइएको छ। त्यसैगरी तिरुको एकीकृत बस्ती संरक्षणका लागि ४० लाख रुपैयाँ विनियोजन गरिएको छ।

भूकम्पपछि पुनःस्थापना गर्नुपर्ने विस्थापित परिवार समग्र रसुवा जिल्लामा ११ सयको हाराहारीमा थिए। तीमध्ये करिब सात सय परिवार पुनःस्थापित भइसकेका छन्। तर अतिप्रभावित मानिएका ६ स्थानका ६ सय ३१ परिवारमध्ये आधाभन्दा बढीको अझै पुनःस्थापना भएको छैन। खाल्टे, शान्तिबजार र पिपलटार गरेर तीन सय ४९ भूकम्प विस्थापित परिवारको वास अस्थायी शिविरमै छ।

पुनर्निर्माण प्राधिकरणले ३४ जिल्लाका ६ लाख ८७ हजार ३४ भवन निर्माण गरेको जनाएको छ। भूकम्पबाट १० लाख ५२ हजार नौ सय ३० भवन प्रभावित भएको थियो। प्राधिकरणले १४ लाख ७४ हजार दुई सय ४१ भवनको सर्वेक्षण गरेको थियो। रसुवामा मात्रै ११ हजार घर पुनर्निर्माण गरेको प्राधिरकणको तथ्यांक छ।

सरकार बाँकी रहेको भूकम्प विस्थापित पुनःस्थापनमा जुटे पनि रसुवामा पुनर्निर्माण कार्य अधुरो र असफल भएको कथाको रूपमा रहेको छ।

भूकम्पका कारण करिब १० लाख निजी आवास, सात हजार पाँच सय ५३ विद्यालय, ४९ हजार ६ सय ८१ कक्षाकोठा, पाँच सय ४४ स्वास्थ्य संस्थामा पूर्ण क्षति, ६ सय ५३ स्वास्थ्य संस्थामा आंशिक क्षति भएको विवरण सरकारले सार्वजनिक गरेको थियो।