काठमाडौँ। नेपाली कांग्रेसका केन्द्रीय सदस्य उदयशमशेर राणाले वर्तमान सरकारबारे पार्टीको धारणा सार्वजनिक गर्न माग गरेका छन्। जारी केन्द्रीय समितिको बैठकमा आफ्नो धारणा राख्ने क्रममा उनले पार्टीको ध्यान राष्ट्रिय राजनीतिमा नभएको भन्दै नेतृत्वको ध्यानाकर्षण गराए।
“राष्ट्रिय राजनीतिमा हाम्रो धारणा के हो? हाम्रो ध्यान गएको छ कि छैन?,” उनले प्रश्न गरे, “हामी कहाँ उभिएका छौँ? यो सरकार आइसकेपछि मित्र राष्ट्रसहित सबैले हतार-हतार यो सरकारलाई समर्थन गरेका छन्। नरेन्द्र मोदीदेखि जम्मैले बधाई दिए। एकपटक होइन दुई-दुईपटक। राजदूतहरू साँघुरो कोठामा हतारिएर गएका बधाई दिन पुगेका छन्।”
२३ र २४ भदौको जेनजी आन्दोलनपछि एमाले र कांग्रेसको गठबन्धन सरकार ढलेर पूर्वप्रधानन्यायाधीश सुशीला कार्कीको नेतृत्वमा अन्तरिम सरकार गठन भएको छ। यो सरकार गठन भएलगत्तै भारतीय प्रधानमन्त्री नरेन्द्र मोदीसहितले बधाई दिएका थिए।
उनले केन्द्रीय समिति बैठकमा महाधिवेशन, विशेष महाधिवेशनबाहेक केही कुरै नभएको भन्दै आपत्ति नजाए। “नेताहरू मिलेर आऊन् भन्ने कार्यकर्ताको भनाइ छ। यो बैठकले हाम्रो एजेन्डा के हो क्लियर हुनुपर्छ। बैठक लामो चलिसक्यो। बाहिर माहोल अर्कै छ। विशेष महाधिवेशन गर्ने कि के गर्ने? नियमित गर्ने कि के गर्ने? बाहेक केही कुरा भएन। अहिले देशको एजेन्डा यही हो?,” उनले भने, “एमालेले आफ्नो कुरा क्लियर गरिसक्यो त्यसमा हाम्रो समर्थन नहोला तर उसको कुरा क्लियर भइसक्यो। माओवादी साना पार्टी मिलाउन लागेको छ। स्वतन्त्र पार्टी डायलग गरिरहेको छ।”
उनले जेनजी आन्दोलनका क्रममा सभापति शेरबहादुर देउवामाथि आक्रमण हुँदै कोही नबोलेको विषयमा किन छलफल गरिएन? भन्दै प्रश्न गरे।
उनले पार्टीको विशेष महाधिवेशन भने गर्न नहुनेमा आफू क्लियर रहेको बताए। “पार्टी अधिवेशनको कुरा गर्दा एउटा कुरामा म क्लियर छु। हामी विशेष महाधिवेशनमा जानु हुँदैन। महाभारतको चक्रव्यूहमा छिर्छौं। हामी जान्छौँ तर निस्किन सक्दैनौँ। हामी एक भएर आउँछौँ, भाँचिएर आउँछौँ वा आउँदै आउँदैनौँ। त्यसैले यसमा लाग्नुहुँदैन,” उनले भने।
