काठमाडौँ। जनार्दन शर्माले नेतृत्व गरेको ‘प्रगतिशील राष्ट्रिय अभियान’ नेपालले ३१ सदस्यीय केन्द्रीय समिति सार्वजनिक गरेको छ। संवाद डबलीमा पत्रकार सम्मेलन आयोजना गरेर अभियानले बिहीबार केन्द्रीय समिति सार्वजनिक गरेको हो।

शर्मा नेतृत्वको केन्द्रीय समितिमा सुदन किराती, टेकेन्द्र भट्ट, नारायणी शर्मा, मदन भट्टराई, मदन लिम्बू, सम्झना राई, पुजन सिंह, अरविन्द यादव, लक्ष्मी गुरुङ, प्रकाशचन्द पाण्डे, राजु आलेमगर, सन्तोष विष्ट, प्रेमबहादुर तामाङ, यज्ञबल्लभ शर्मा, क्षितिज सापकोटा, बाबुराम नेपाली, किस्मतकुमार विक, सन्दीप पुन, गेहेन्द्र ढकाल, भीमबहादुर मल्ल, गोरखबहादुर केसी, जटिल कार्की, देवीराम देवकोटा, जन्मदेव जैशी, दीपक साउद, पुष्प न्यौपाने, अच्युत भट्ट, विमला सिंह, निर्मला गौतम, रामहरि पुडासैनी र धर्मराज खतिवडा छन्।

अभियानले जेनजी विद्रोहपछि नेपालका पुराना पार्टीहरु विघटित अवस्थामा पुगेको बताउँदै अब नेपालको समग्र राजनीतिक आधारभूत पुनःसंरचना गर्नुपर्ने बताएको छ। पत्रकार सम्मेलनमा अभियानका नेता सुदन किरातीले युवाहरूको आन्दोलनको समयमा हेलिकोप्टर चढेर भागेका र सैनिक ब्यारेकमा लुक्न बाध्य भएका असफल अहंकारी नेताहरू रुपान्तरण कुनै संकेत नभएको बताए। उनले अबको चुनावमा जनताले जवाफ दिने बताए।

“समग्र राजनीतिमा भएका समस्यालाई पहिचान गर्दै, तिनीहरूको आमूल पुनर्संरचना गर्दै, नेपालका दीर्घकालीन र अल्पकालीन सबै समस्या समाधान गर्ने जनताको भावनाको जगमा टेकेको प्रगतिशील राजनीतिक शक्ति निर्माणमा एकजुट हुन आग्रह गर्दछौं‚” किरातीले भने। उनले भ्रष्टाचार र बेथितिको दलदलमा सफाई देशलाई यो अवस्थामा पुर्‍याउने सफल, नैतिकताहीन र अहंककारी नेताहरूलाई अगामी निर्वाचनबाट जरैदेखि उखेलेर फाल्न आह्वानसमेत गरे। अभियानले सातबुँदे अपिलसमेत सार्वजनिक गरेको छ।

यस्तो छ ‘प्रगतिशील राष्ट्रिय अभियान’को अपिल

सर्वप्रथम, सबैखाले मुक्ति आन्दोलनको क्रममा सहादत प्राप्त गर्नुभएका महान शहिदहरुप्रति हामी हार्दिक श्रद्धाञ्जली अर्पण गर्दछौँ। साथै घाइते तथा बेपत्ता योद्धाहरुको त्याग र समर्पणको इतिहास हाम्रो साझा पुँजी हुने प्रतिवद्धता पनि व्यक्त गर्दछौँ।

विषय प्रवेश,
नेपालको पछिल्लो एक शताब्दिको इतिहास न्याय, समानता, उन्नती तथा आत्मसम्मानका खातिर चलेका संघर्षहहरुले भरिएको छ। हरेक वस्ति, तह र तप्काले आशु, रगत र पसिनाले नेपालमा परिवर्तनको उज्यालो ल्याउनमा आफुलाई संलग्न गराएका छन्। देशले संघीय लोकतान्त्रिक गणतन्त्र सहितको नयाँ संविधानको रुपमा केहि उपलब्धि हासिल गरेको पनि थियो।

तर नेपालको राजनीति र शासन जनताको अपेक्षा अनुरुप चलेन। आत्मसम्मान, पहिचान, समता, विकास, सुशासन र राष्ट्रियताको संबर्धन जस्ता विषय सत्ताको खेलका सामु निरिह बन्न पुगे।

फलतः आज देश अप्ठेरोमा छ। गत एक सय वर्ष यता चलेका सबैखाले जनसंघर्षको जगमा हासिल भएका उपलब्धिहरु आम मानिसका जीवन व्यवहारमा अनुवाद हुन नसक्दा चौतर्फी निराशा, आक्रोश र अन्योलको अवस्था सिर्जना भएको छ। भ्रष्टाचार, नातावाद, बेरोजगारी र राजनीतिक पार्टीहरुमा देखिएको व्यापक भ्रष्टीकरणका कारण जेनजी विद्रोह भएको घाम जतिकै छर्लङ्ग छ।

गत २०८२ भदौ २३ र २४ को जेनजी विद्रोहमा राजनीतिक दलका कार्यालय र नेताहरुको घर आगोले खरानी बनाएसँगै वस्तुतः नेपालको पुराना राजनीतिक दलहरु सारतः विघटित भएका छन्। जेनजी विद्रोहले निरङ्कुश र दमनकारी ओली सरकारको विघटन गरी सुशीला कार्कीको नेतृत्वमा अन्तरिम सरकार गठन भएको कुरा सर्वविदितै छ।

युवाहरुको आन्दोलनको समयमा हेलिकप्टर चढेर भागेका तथा सैनिक ब्यारेकमा लुक्न बाध्य भएका असफल र अहङ्कारी नेताहरु जेनजी विद्रोहद्वारा स्थापित मुद्दा अनुरुप रुपान्तरण हुनैपर्ने थियो।

रुपान्तरणको गुञ्जायस त परको कुरा, तिनै नेताहरु पुरानै शैलीमा हुड्ङ्कार गर्न थालेको दृश्यले जनतालाई पुनः आक्रोशित बनाउँदै छ। इतिहास साक्षि छ, जब देशमा नागरिकहरु आक्रोशित हुन्छन् तब विद्रोहका रुपमा विष्फोट हुन्छन्। जेनजी विद्रोह त्यसैको एउटा चेतावनी मात्र थियो। आगामी दिनमा यो चेतावनीलाई सही रुपमा सम्बोधन गर्न सकिएन भने यो विद्रोह पुनः नयाँ स्वरुपमा प्रकट हुने निश्चित छ।

यी तमाम समस्याको समाधान गर्न सक्ने शक्ति जनतामै निहित छ। तसर्थ, भ्रष्टाचार र बेथितिको दलदलमा फसाई देशलाई यो अवस्थामा पुर्याउने सफल, नैतिकताहिन र अहङ्कङ्कारी नेताहरुलाई आगामी निर्वाचनबाट जरैदेखि उखेलेर फाल्न हामी सबैमा आह्वान गर्दछौं।

समग्र राजनीतिमा भएका समस्यालाई पहिचान गर्दै, तीनिहरुको आमुल पुनर्संरचना गर्दै, नेपालका दिर्घकालिन र अल्पकालिन सबै समस्या समाधान गर्ने जनताको भावनाको जगमा टेकेको प्रगतिशील राजनीतिक शक्ति निर्माणमा एकजुट हुन आग्रह गर्दछौँ।

समयको यही आवाज र आवश्यकतालाई बुझेर देश तथा विदेशमा बस्नु हुने सम्पूर्ण वामपन्थी, प्रगतिशील, लोकतान्त्रिक र देशभक्त जनसमुदायहरुलाई ढिलो नगरी ’प्रगतिशील राष्ट्रिय अभियान’मा आवद्ध हुन जोडदार अपिल गर्दछौं।

हामी आगामी निर्वाचन केवल यथास्थितिको बिडो थाम्ने अर्थमा नभई निर्वाचन पश्चात् राज्यका समग्र संरचना नीतिगत अभ्यासगत रूपमा असफल भएको अवस्थामा नयाँ जगमा पुनर्संरचना गरी सुदृढ राष्ट्र, सभ्य नागरिक र बलियो राष्ट्रिय शक्ति निर्माण गर्ने उद्देश तर्फ जानेछौं।

प्रगतिशील राष्ट्रिय अभियान मार्फत हामी सबै वामपन्थी, प्रगतिशील, देशभक्त, लोकतान्त्रिक समुह, व्यक्तिहरुलाई एक ठाउँमा ल्याउने, वर्तमान राजनीतिले उत्पन्न गरेको निराशा चिर्ने, सम्वैधानिक लिकबाट बाहिरिएको अवस्थालाई ट्रयाकमा ल्याउने, जेन्जी आन्दोलनका मागहरू बिशेष गरी भ्रष्टाचार र नेतातन्त्र विरुद्ध जनपरिचालन गर्ने उद्देश्य रहेको छ।

यस क्रममा हामी नेपाली राजनीति र दशकमा हुने राजनैतिक आन्दोलनको असफलताका कारणहरुको पहिचान गरी तीनलाई दोहोरिन नदिने र नेपालको आगामी राजनैतिक आर्थिक, सामाजिक, सांस्कृतिक एवम् पर्यावरणीय दृस्टीले अपनाउनु पर्ने स्पष्ट मार्गचित्र सहितको नेपाली समाजवादको रोडम्याप तयार पार्न, समग्र आन्दोलन पुनर्संरचनाको लागि बृहत् राजनैतिक सम्मेलनको मार्ग निर्देशन अनुसार जनचाहना बमोजिमको पार्टी निर्माण गर्नेछौं।

अन्त्यमा,
अग्रजहरूको इतिहासलाई साझा धरोहर ठान्दछौँ। उहाँहरुप्रति सँधै श्रद्धाले शिर निहुराउनेछौँ। जनताको उज्यालो भविष्य तथा सिर्जनात्मक स्वप्नशीलताका खातिर उहाँहरुको त्याग, समर्पण तथा वलिदान हाम्रो आगामी यात्राको मार्गदर्शक हुनेछ। नेपालमा वाम लोकतान्त्रिक अग्रजहरूको सकारात्मक पक्षहरुलाई आत्मसात गर्दै कमजोरीहरुबाट शिक्षा लिएर अगाडि बढ्ने प्रतिबद्धता व्यक्त गर्दछौं।

हाम्रो अपिल :
१) भ्रष्टाचार, विभेद र असमानताको रुपमा रहेका नेपाली समाजको मुख्य शत्रुमाथि विजय हासिल गरौं।
२) सांस्कृतिक समतामा आधारित समाज निर्माण गरौं।
३) नेपाली राजनीतिको आधारभूत पुनःसंरचना गरौं।
४) सबै अग्रगामी आन्दोलनका सहिद, घाइते र बेपत्ता योद्धाहरुको सपना पूरा गरौं।
५) जुनसुकै मूल्यमा निर्वाचनलाई सफल पारौं, जनताको एकताको बलमा अहङ्कारी र असफलहरूलाई बिदा गरौं।
६) देशभित्र र बाहिर जहाँसुकै रहेका नेपालीहरूले सबै तहमा प्रगतिशील राष्ट्रिय अभियान सम्पर्क समिति गठन गरौं।
७) जेनजी विद्रोहबाट स्थापित मुद्दाहरुलाई यथाशीघ्र सम्बोधन गर्न गराउन चौतर्फी सक्रिय बनौं। सुदृढ राष्ट्र सभ्य नागरिक बदलिँदो राष्ट्रिय शक्ति निर्माण गर्ने एजेण्डासहित राजनीतिकको समग्र पुनर्संरचना गर्ने लक्ष्यप्रति प्रतिबद्ध होऔं।