२ सय ७१ रनको लक्ष्य पछ्याएको भारतले १० ओभरभन्दा बढी बाँकी छँदै १ खेलाडीको नोक्सानीमा सजिलै जित निकाल्यो।

भारतको जितका केन्द्रमा रहे ओपनर यशस्वी जैसवाल। जसले आफ्नो पहिलो ओडिआई शतक प्रहार गरे। १ सय २१ बल खेलेका उनले १२ चौका र २ छक्का सहित १ सय १६ रनमा अविजित रहे।

जयसवालले पहिलो विकेटका‌ लागि रोहित शर्मासँग १ सय ५५ रनको साझेदारी गरे। रोहित शर्माले ७५ र विराट कोहलीले अविजित ६५ रन बनाएका थिए ।

त्यसअघि विशाखापट्टनममा टस हारेर ब्याटिङ गरेको दक्षिण अफ्रिका ४७ ओभर ५ बलमा २ सय ७० रनमा अलआउट भयो। दक्षिण अफ्रिकाका क्विन्टन डे ककले १ सय ६ रनको शतकीय पारी खेले पनि टोलीलाई जिताउन सकेनन्। भारतका भारतका प्रसिद्ध कृष्णले ४ विकेट लिए।

यसअघि यी दुई टोलीबीच भएको टेस्ट शृङ्खलामा दक्षिण अफ्रिकाले भारतलाई हराएको थियो । अब भारत र दक्षिण अफ्रिकाबीच ५ खेलको टी–२० शृङ्खला आउँदो मङ्गलवारदेखि कटकमा शुरु हुनेछ।