काठमाडौँ। उपराष्ट्रपति रामसहायप्रसाद यादवले सार्वजनिक सेवा प्रसारण संस्थाले नयाँ प्रविधि‚ र बढ्दो जनअपेक्षा आत्मसात् गर्दै प्रसारण सामग्रीको गुणस्तर र प्रभावकारिता बढाउन आवश्यक रहेको बताएका छन्।
सार्वजनिक सेवा प्रसारण नेपालअन्तर्गतको नेपाल टेलिभिजनको ४१औँ वार्षिकोत्सवका अवसरमा आज (शनिबार) आयोजित विशेष समारोहमा उनले डिजिटल युगमा विषयवस्तु‚ पहुँच‚ प्रस्तुति र प्रविधिलाई निरन्तर विस्तार गर्नु अपरिहार्य रहेको बताए।
“परम्परागत रेडियो वा टेलिभिजनमा सीमित नभई डिजिटल माध्यममार्फत जनतासम्म पुग्नु आजको चुनौती मात्र होइन‚ नयाँ पुस्तासम्म राष्ट्रको आवाज पुर्याउने अवसर पनि हो‚” उनले भने‚ “सरकारी सञ्चारमाध्यमको प्रमुख दायित्व राष्ट्रको आवाजलाई सशक्त बनाउने‚ नागरिकलाई जानकारीमूलक‚ शैक्षिक तथा प्रेरणादायी सामग्री उपलब्ध गराउने र लोकतान्त्रिक मूल्यहरूको संरक्षण गर्ने हो।”
नेपाल टेलिभिजन र रेडियो नेपालले राष्ट्रिय एकता‚ सामाजिक सद्भाव‚ सांस्कृतिक विविधता र लोकतान्त्रिक मूल्यहरूको प्रवर्द्धनमा निरन्तर योगदान दिँदै आएको उनले उल्लेख गरे। उनले भने‚ “हामी सबै मिलेर सार्वजनिक सेवा प्रसारणलाई अझ सबल‚ प्रभावकारी र जनमुखी बनाउन योगदान गरौँ।” उनले राष्ट्रको आवाजलाई विश्वभर पुर्याउने‚ नागरिकलाई सशक्त बनाउने र समृद्ध नेपाल निर्माणमा सहायक बन्ने सामूहिक जिम्मेवारी पूरा गर्न आह्वान गरे।
पत्रकारिता लोकतन्त्रको मेरुदण्ड भएको जनाउँदै उनले समाजमा सत्यतथ्य‚ निष्पक्षता र जनताको आवाजलाई उजागर गर्ने जिम्मेवारी पत्रकारिताले गर्दै आएको बताए। “पत्रकारितामा समावेशिता‚ समान अवसर र सबैको आवाजको प्रतिनिधित्व हुनु लोकतान्त्रिक मूल्य र सामाजिक न्यायको आधारभूत सर्त हुन‚” उनले भने‚ “कुनै पनि समुदाय वा नागरिकको आवाज उपेक्षित हुनु लोकतन्त्रको आत्मालाई कमजोर बनाउने कार्य हो। त्यसैले पत्रकारिता सबै वर्ग‚ भाषा‚ संस्कृति र भौगोलिक क्षेत्रलाई समान अवसरसहित प्रतिनिधित्व गर्ने माध्यम बन्नुपर्छ।”
अर्को प्रसङ्गमा उपराष्ट्रपति यादवले आसन्न प्रतिनिधिसभा सदस्य निर्वाचनमा प्रत्येक मतदाताले स्वतन्त्र‚ निष्पक्ष र भयरहित वातावरणमा मतदान गर्न पाउने सुनिश्चितता गरिनुपर्ने बताए। “यसका लागि सञ्चारमाध्यमको भूमिका अत्यन्तै महत्त्वपूर्ण छ। निर्वाचनसम्बन्धी सही सूचना प्रवाह‚ मतदाताको सचेतना अभिवृद्धि तथा शान्तिपूर्ण वातावरण निर्माणमा सञ्चारमाध्यमले जिम्मेवारीपूर्वक योगदान गर्नुपर्छ‚” उनले भने।
सञ्चार तथा सूचना प्रविधि मन्त्रालयका सचिव लक्ष्मीकुमारी बस्नेतले राजनीतिक घटनाक्रम वा प्राकृतिक विपत्तिमा निष्पक्ष एवं आधिकारिक सूचनाको संवाहकका रूपमा नेपाल टेलिभिजनले भूमिका निर्वाह गर्दै आइरहेको बताइन्। “सत्यतथ्य सूचना आमजनतासमक्ष पुर्याउनु‚ जनचेतना अभिवृद्धि‚ संस्कृति संरक्षण र सामाजिक रुपान्तरणजस्ता योगदानमार्फत नागरिक अधिकार‚ अभिव्यक्ति स्वतन्त्रता र सामाजिक दायित्वसँग जोड्ने कार्य नेपाल टेलिभिजनबाट हुँदै आएको छ‚” उनले भनिन्।
सार्वजनिक सेवा प्रसारण नेपालका कार्यकारी अध्यक्ष महेन्द्र विष्टले अन्तर्राष्ट्रिय मान्यता र राष्ट्रिय आवश्यकताका आधारमा सार्वजनिक प्रसारण संस्थाहरु सञ्चालनमा रहेको बताए। राष्ट्रिय प्रसारकका रूपमा जनतालाई केन्द्रविन्दुमा राखेर सार्वजनिक प्रसारणलाई अघि बढाउनुपर्नेमा जोड दिँदै उनले राष्ट्रिय एकता‚ समृद्धि र विपद्मा नागरिक रक्षालाई प्रमुख आधार मानेर सार्वजनिक प्रसारण संस्थाका विषयवस्तु निर्माण हुँदै आएको स्पष्ट पारे।
समारोहमा उपराष्ट्रपति यादवले नेपाल टेलिभिजनमा ४० वर्ष‚ ३० वर्ष र २० वर्ष सेवा गरेका कर्मचारीलाई दीर्घसेवापदक प्रदान गरेका थिए। कार्यक्रममा टेलिभिजनका उत्कृष्ट कर्मचारी‚ पत्रकार‚ विज्ञानपनदाता‚ कार्यक्रम निमार्ता लगायतलाई सम्मान गरिएको थियो। १७ माघ २०४१ मा स्थापना भएको नेपाल टेलिभिजन समयसँगै प्रविधि र प्रवृत्तिमा आएका परिवर्तनअनुरूप परिस्कृत हुँदै अघि बढिरहेको छ।
