काठमाडौँ। गृहमन्त्री ओमप्रकाश अर्यालले नयाँपुस्ताको भावनाअनुरूप काम गर्दै उनीहरूलाई न्यायको अनुभूति दिलाउने गरी कार्यसम्पादन गर्न मातहतका निकायलाई निर्देशन दिएका छन्।
गृहसचिव रामेश्वर दंगालको अध्यक्षतामा गृह मन्त्रालयमा आइतबार बसेको नियमित ‘एसएमटी’ बैठकमा विशेष उपस्थिति जनाउँदै उनले कर्मचारीहरूले सक्रियतापूर्वक आफ्नो जिम्मेवारी निर्वाह गर्दै आगामी निर्वाचनमा सम्पूर्ण ध्यान केन्द्रित गर्नुपर्ने बताए।
“अहिलेको सरकार निर्वाचनको सरकार हो। त्यसैले पुरानै संरचना वा ऐन-नियममा सीमित भएर मात्र होइन, प्रविधिको अधिकतम उपयोग गर्दै निर्वाचन प्रक्रियालाई सहभागीमूलक बनाउन तथा नागरिकको मताधिकार सुनिश्चित गर्न सबैले जिम्मेवारी वहन गर्नुपर्छ,” अर्यालले भने।
उनले विभागीय प्रमुखलाई मातहतका कार्यालयको जिम्मेवारी प्रभावकारी ढंगले सम्पादन गर्न निर्देशन दिए। उनले सेवा प्रवाहमार्फत परिवर्तनको अनुभूति दिलाउन पनि निर्देशन दिए। गृह मन्त्रालयमा स्थापना गरिएको जेन-जी समन्वय समितिलाई अझ सक्रिय बनाउँदै पीडितका गुनासा सुन्ने र समाधान गर्ने प्रक्रियालाई प्रभावकारी बनाउन सकिए बाहिर देखापरेका भ्रमपूर्ण धारणा हटाउन सकिने गृहमन्त्री अर्यालको भनाइ थियो। त्यस अवसरमा उनले जेन-जी आन्दोलनमा घाइते भएकालाई राहत कार्ड फिल्डमै वितरण गर्ने र घाइते राहत कार्यविधि छिटै टुंग्याउन निर्देशन दिए।
बैठकमा गृहसचिव दंगालले मन्त्रालय तथा मातहतका संरचनाको कार्यसम्पादनप्रति आफू सन्तुष्ट रहेको बताए। मन्त्रालयको नेतृत्व गरेयता राष्ट्रिय परिचयपत्र नियमावली, सशस्त्र प्रहरी नियमावलीलगायत दर्जनभन्दा बढी नियमावली संशोधन भइसकेको र नागरिकता नियमावली अन्तिम चरणमा पुगेको जानकारी दिए।
उनले मन्त्रालयको तत्काल सुधार कार्ययोजनालाई प्राथमिकतामा राखी काम गर्न मातहतका प्रमुखलाई निर्देशन दिए। उनले २३ भदौपछि मन्त्रालयको कार्यशैलीमा हिजोभन्दा आज आकाश-जमिनको फरक आएको दाबी गरे।
बैठकमा मन्त्रालयका विभागीय प्रमुख, महाशाखा तथा शाखा प्रमुखहरूले आफ्नो-आफ्नो क्षेत्रको प्रगति तथा वस्तुस्थितिबारे जानकारी गराएका थिए।
