काठमाडौँ। नेकपा एमालेले राजधानीमा प्रदर्शन र र्‍याली आयोजना गरेको छ। काठमाडौँकेन्द्रित जनसभाका लागि शनिबार भृकुटीमण्डप र आसपासका क्षेत्रमा एमालेले प्रदर्शन गरेको हो।

संविधान र लोकतन्त्रका लागि आयोजित जनसभा पार्टीको जनपरिचालनअन्तर्गतको अन्तिम चरणका रूपमा आयोजना गरिएको पार्टीको केन्द्रीय प्रचार तथा प्रकाशन विभागका प्रमुख राजेन्द्र गौतमले बताए।

पार्टीको बागमती प्रदेश कमिटीद्वारा आयोजित कार्यक्रममा प्रदर्शनी मार्गबाट रत्नपार्क परिक्रमा गरेर भृकुटीमण्डपमा आमसभामा परिणत हुनेछ। जनसभामा एमालेका अध्यक्ष एवं पूर्वप्रधानमन्त्री केपी ओलीलगायतले सम्बोधन गर्नेछन्।

यसअघि एमालेले गत २२ कात्तिकमा देशैभरिका वडामा वडा भेला, २५ गते सबै पालिकामा र्‍याली सम्पन्न गरेको थियो। यस्तै कात्तिक २९ गते सबै जिल्लामा जनसभा आयोजना गरिएको थियो।