काठमाडौं। धादिङमा निर्माणाधीन नौबिसे–नागढुंगा सडकखण्डको काम तीव्र गतिमा अघि बढिरहेको छ। आयोजनाका अनुसार हालसम्म करिब ८५ प्रतिशत निर्माण सम्पन्न भइसकेको छ र बाँकी काम निर्धारित समयभित्र सक्ने तयारी गरिएको छ।

आयोजना प्रमुख केशवप्रसाद ओझाले जानकारी दिएअनुसार पहिलो प्याकेजअन्तर्गत १२.५ किलोमिटर सडक विस्तार तथा दुईवटा पुल निर्माण गर्ने लक्ष्य थियो। तीमध्ये अधिकांश काम पूरा भइसकेको छ भने अब तेस्रो तहको कालोपत्र र खानीखोलामा निर्माणाधीन अकासे पुल सम्पन्न गर्न बाँकी छ।

आगामी ३५ दिनभित्र मुख्य संरचनागत काम सक्ने लक्ष्य राखिएको छ। अन्तिम तहको कालोपत्रपछि सडक सुरक्षासम्बन्धी संकेतचिन्ह, रेलिङ र रङरोगनको काम सुरु गरिनेछ।

निर्माण प्रक्रिया भने विभिन्न कारणले केही प्रभावित भएको छ। प्रतिनिधिसभा निर्वाचन र होली पर्वका कारण काममा अस्थायी अवरोध आउन सक्ने आयोजनाको भनाइ छ। साथै, खानीखोला क्षेत्रमा रहेको टहरा व्यवस्थापन विवादका कारण पनि केही समय ढिलाइ भएको थियो।

स्थानीय बासिन्दासँग प्रत्यक्ष सरोकार राख्ने आयोजनामा सहमति जुटाउन समय लाग्दा काममा चुनौती थपिएको बताइन्छ। यद्यपि, अधिकांश प्रभावित परिवारको व्यवस्थापन गरिसकिएकाले अब निर्माणले थप गति लिने अपेक्षा गरिएको छ।