काठमाडौँ। संघीय राजधानी काठमाडौँ उपत्यकामा नेपाली कांग्रेसका प्रतिनिधिसभा सदस्यका उम्मेदवारहरूका तर्फबाट नेपाली कांग्रेस काठमाडौँ उपत्यका विकास प्रतिबद्धतापत्र भिजन १० सार्वजनिक गरिएको छ।

काठमाडौँमा आयोजित एक कार्यक्रमबीच महामन्त्री प्रदीप पौडेलको उपस्थितिमा तीनवटै जिल्लाका उम्मेदवारको भर्चुअल सहभागितामा प्रतिज्ञा-पत्र सार्वजनिक गरिएको हो।

प्रतिज्ञापत्रमा तीनवटै जिल्लालाई एउटै सहरका रूपमा लिई स्थान विशेषका मौलिक विशिष्टतालाई ध्यानमा राख्दै एकीकृत सहरी विकास योजना तर्जुमा गरी कार्यान्वयन गरेर विश्वको सफा, सुन्दर, विकसित, आधुनिक, सुशासित एवं जीवन्त सहरका रुपमा विकास गरिने उल्लेख छ।

उपत्यकाको बहन क्षमताबमोजिम सहरको व्यवस्थापन गर्दै बृहत्तर संघीय राजधानी पुनःसंरचना योजना कार्यान्वयन गर्न काठमाडौँ उपत्यका विकास प्राधिकरणलाई सृदृढ एवं सक्षम बनाइने प्रतिज्ञा-पत्रमा छ।

यसैगरी उपत्यकाको सडक यातायातलाई सहज, व्यवस्थित र अनुमानयोग्य बनाउन एकीकृत सहरी यातायात र स्मार्ट मोबिलिटी नीति अवलम्बन गर्दै मास ट्रान्सपोर्ट सहितको सडक पूर्वाधार निर्माण तथा यातायात व्यवस्थापन गर्दा पैदलयात्री, साइकल यात्री तथा सबै नागरिकको आवश्यकतालाई विशेष ध्यान दिँदै केबल सिटीका रुपमा विकास गरिने प्रतिज्ञा-पत्रमा छ।

प्रतिज्ञा-पत्रले उपत्यकाभित्रको प्रदूषण नियन्त्रणका लागि एकीकृत मापदण्ड तयार पार्नुका साथै सार्वजनिक तथा पुरातात्त्विक स्थलको संरक्षण तथा व्यवस्थापनका लागि एकीकृत योजना बनाइ कार्यान्वयनमा ल्याइने भनेको छ। यस्तै उपत्यकाका नदीको संरक्षण, शुद्धीकरण तथा सौन्दर्यीकरणको एकीकृत योजना कार्यान्वयनमा ल्याउँदै आसपासका निकुञ्ज, सार्वजनिक वन तथा पार्कहरूलाई संरक्षण गर्दै आरोग्य जीवनशैलीका लागि उचित योजना कार्यान्वयन गर्नेसमेत प्रतिज्ञा-पत्रमा छ।

यो पनि…

बदलिएको कांग्रेसको चुनावी चाल

शिक्षा क्षेत्रलाई समयसापेक्ष, प्रविधिमैत्री र व्यवहारिक बनाउन आवश्यक गुणस्तरीय शिक्षामा सहज पहुँच सुनिश्चित गर्नुका साथै स्वास्थ्य सेवालाई सर्वशुलभ, गुणस्तरीय एवं प्रविधिमैत्री बनाइ समग्र स्वास्थ्य प्रणालीलाई विश्वस्तरीय बनाउँदै लगिने काठमाडौँ उपत्यकाका कांग्रेस उम्मेदवारहरूको प्रतिज्ञा छ।

प्रतिज्ञा-पत्रले उपत्यकाको एकीकृत भू-उपयोग नीति तर्जुमा गरी कार्यान्वयनमा ल्याउँदै सहरी पूर्वाधार, भवन संहिता तथा ढल व्यवस्थापन सहितको पुनःरुत्थान गुरुयोजना बनाई कार्यान्वयनमा ल्याउने तथा विपद् व्यवस्थापनका लागि पूर्वचेतावनीसहित कमान्ड सेन्टर सञ्चालनमा ल्याउने विषय समेटेको छ।

बढ्दो बेरोजगारी, गरिबी तथा असमानता घटाउन रोजगारीका अवसर सिर्जना गर्ने, युवा लक्षित रोजगारी तथा डिजिटल प्रविधि एवं आइटीसँग जोडिएका उद्यमका विशेष कार्यक्रम सञ्चालन गर्ने, सामाजिक सुरक्षाका प्याकेजमार्फत गरिबी निवारण तथा विद्यमान असमानता कम गरी उपत्यकावासीको जीवन सहज बनाउने, सुकुम्बासी र अव्यवस्थित बसोबासलाई व्यवस्थित गर्न विशेष योजना कार्यान्वयनमा ल्याउनेसमेत उम्मेदवारहरूले साझा प्रतिज्ञा गरेका छन्।

उपत्यकाको खानेपानी समस्याको दिगो समाधान गर्न कम्तीमा आगामी ५० वर्षको जनसंख्यालाई ध्यानमा राखेर बृहत्तर योजना निर्माण गर्दै भूमिगत जलसतहको अवस्था सम्बोधन गर्ने गरी जलभण्डारण तथा जलपुनःभरण योजना तर्जुमा गरी कार्यान्वयन गरिनेसमेत उम्मेदवारहरूको प्रतिज्ञा-पत्रमा छ।

कार्यक्रममा महामन्त्री प्रदीप पौडेलले काठमाडौँ उपत्यकाको दिगो व्यवस्थापन र विकास कांग्रेसको प्राथमिकतामा रहेको भन्दै एक्ला एक्लैभन्दा सामूहिकतामा प्रभावकारी हुने भएकाले एकीकृत विकासका लागि साझा प्रतिज्ञा गरिएको बताए।

“यस प्रतिज्ञा-पत्रले भावी दिनमा उपत्यकाको विकासमा एकजुट भएर काम गर्नका लागि समेत मार्ग दर्शन गर्नेछ,” उनले भने। प्रतिज्ञा-पत्रमा काठमाडौँ १ का उम्मेदवार प्रबल थापा, काठमाडौँ २ का कविर शर्मा, ३ का रमेश अर्याल, ४ का सचिन तिमिल्सना तथा महामन्त्रीसमेत रहेका काठमाडौँ ५ का उम्मेदवार प्रदीप पौडेलको प्रतिबद्धता छ।

यसैगरी काठमाडौँ ६ का उम्मेदवार सबुजकृष्ण बानियाँ, काठमाडौँ ७ का उम्मेदवार प्रमोदहरि गुरागाईं, काठमाडौँ ८ की सपना राजभण्डारी, काठमाडौँ ९ की नानु बास्तोला तथा काठमाडौँ १० का उम्मेदवार हिमाल कार्कीको प्रतिबद्धतासमेत छ।

कांग्रेसका तर्फबाट ललितपुर १ का उम्मेदवार उदयशमशेर राणा, ललितपुर २ का प्रेमकृष्ण महर्जन तथा ललितपुर ३ का उम्मेदवार जितेन्द्रकुमार श्रेष्ठले समेत प्रतिज्ञा-पत्रमा प्रतिबद्धता जनाएका छन्। त्यस्तै भक्तपुर १ का उम्मेदवार किरण न्यौपाने र भक्तपुर २ का उम्मेदवार कविर राणाको पनि प्रतिबद्धता छ।