चितवन।  चितवन मेडिकल कलेज (सीएमसी) मा २१ वर्षीया एक युवतीको मस्तिष्कमा फुटेको नसाको चिरफार नगरी शल्यक्रिया गरिएको छ।

चिकित्सा विज्ञानको क्षेत्रमा दुर्लभ मानिने यस किसिमको शल्यक्रिया सफलतापूर्वक सम्पन्न भएसँगै आज ती युवतीलाई ‘डिस्चार्ज’ गरिने अस्पतालले जनाएको छ।

अस्पतालका इन्टरभेन्सनल रेडियोलोजिस्ट डा. विवेककुमार साह र कार्डियोभास्कुलर सर्जन प्रा. डा. अनिल आचार्यको टोलीले शल्यक्रिया गरेको हो। साहका अनुसार चितवनको इच्छाकामना गाउँपालिकाकी युवती खाना खान नसकेपछि तीन दिनअघि सीएमसी अस्पताल आएकी हुन्। परीक्षण गर्दै जाँदा मस्तिष्कको ठूलो नसा फुटेको एमआरआई र सीटी स्क्यानको परीक्षणले देखाएको थियो।

“चिरफार नगरी आधुनिक न्युरो इन्टरभेन्सनल प्रविधिबाट नसा फुटेको ठाउँमा जाली राख्यौँ‚”  उनले थपे, “यस किसिमको समस्यालाई दुर्लभ मानिन्छ, एक हजारमा एक जनालाई यो समस्या देखिन्छ।” यस्तो अवस्थामा जोखिमयुक्त ठाउँ बन्द गरी नसा जोगाउनुपर्ने उनले बताए।

यस्तो जोखिमपूर्ण उपचार गर्न दक्ष जनशक्ति र आधुनिक उपकरण आवश्यक पर्ने अस्पतालका क्याथल्याब इन्चार्ज अमृत काफ्लेले बताए। अस्पतालसँग बीआई-प्लेन क्याथ ल्याब भएकै कारण यो उपचार सम्भव भएको उनको भनाइ छ। आइतबार शल्यक्रिया गरिएकी ती युवतीलाई सोमबार वार्डमा सारिएको र आज अवस्था हेरेर डिस्चार्ज गर्ने तयारी गरिएको काफ्लेले जानकारी दिए।

साहका अनुसार मानिसमा शरीरको प्रतीरक्षा प्रणाली कमजोर हुँदा नसा पनि कमजोर हुने र फुट्ने समस्या देखिन्छ। उपचारका क्रममा नसा थप फुट्न सक्ने भएकाले निकै संवेदनशील ढंगबाट काम गर्नुपर्ने उनको भनाइ छ। उनले भने, “चिरफार नगरी धेरै शल्यक्रिया गरिएको भए पनि यस्तो प्रकृतिको जटिल शल्यक्रिया पहिलोपटक गरिएको हो।”