काठमाडौँ। नेपाल चेम्बर अफ कमर्स र नेपाल मेडिसिटी अस्पतालबीच चेम्बरका पदाधिकारी, कर्मचारी, जिल्ला चेम्बरका सदस्य तथा उनीहरूका प्रत्यक्ष आश्रित परिवारलाई सहुलियतपूर्ण स्वास्थ्य सेवा उपलब्ध गराउने उद्देश्यले समझदारीपत्रमा हस्ताक्षर भएको छ।

जमलस्थित चेम्बर भवनमा भएको सम्झौता हस्ताक्षर कार्यक्रममा चेम्बरका तर्फबाट स्वास्थ्य समिति संयोजक मृगेन्द्रमेहर श्रेष्ठ तथा मेडिसिटी अस्पतालका तर्फबाट प्रमुख कार्यकारी अधिकृत डा. अमित तोमरले सम्झौतापत्रमा हस्ताक्षर गरे। एक वर्षका लागि लागू हुने सम्झौताअनुसार चेम्बरका कार्यसमिति सदस्य, कर्मचारी, जिल्ला चेम्बर सदस्य तथा उनीहरूका प्रत्यक्ष आश्रित (पति/पत्नी, बाबुआमा तथा २२ वर्षमुनिका दुई सन्तान) ले नेपाल मेडिसिटीमा उपचार गराउँदा विशेष स्वास्थ्य सेवा तथा विभिन्न सहुलियत प्राप्त गर्नेछन्।

सम्झौताअनुसार नेपाल मेडिसिटीले अस्पतालको भर्ना तथा बाह्यरोगी सेवामा १० प्रतिशत छुट प्रदान गर्नेछ। यद्यपि औषधि, उपभोग्य सामग्री, इम्प्लान्ट, प्याकेज सेवा तथा बाह्य परीक्षणमा भने उक्त छुट लागू हुने छैन। बिमामार्फत प्रत्यक्ष क्यासलेस सेवा प्राप्त हुने अवस्थामा पनि छुट सुविधा लागू नहुने व्यवस्था गरिएको छ।

यस सहकार्यअन्तर्गत मेडिसिटीले चेम्बरका सदस्य तथा कर्मचारीहरूका लागि वर्षमा दुईपटक स्वास्थ्य सचेतना कार्यक्रम सञ्चालन गर्ने, बेसिक लाइफ सपोर्ट तालिम प्रदान गर्ने, विशेष स्वास्थ्य प्याकेज उपलब्ध गराउने तथा रक्तदान कार्यक्रम आयोजना गर्ने सहमति भएको छ।

दुवै संस्थाले सेवा प्रवाह, समन्वय तथा सूचना आदानप्रदानका लागि सम्पर्क व्यक्ति तोक्ने तथा प्राप्त सूचनाको गोपनीयता कायम राख्ने प्रतिबद्धता व्यक्त गरेका छन्।

त्यस अवसरमा चेम्बर अध्यक्ष कमलेशकुमार अग्रवालले सहकार्यबाट चेम्बरका सदस्य, उनीहरूका परिवार तथा व्यावसायिक समुदायले गुणस्तरीय स्वास्थ्य सेवामा सहज पहुँच प्राप्त गर्ने विश्वास व्यक्त गरे। नियमित स्वास्थ्य परीक्षण, स्वास्थ्य सचेतना तथा निवारणमुखी स्वास्थ्य सेवाले स्वस्थ व्यावसायिक समुदाय निर्माणमा योगदान पुग्ने उनको भनाइ थियो।

यस्तै मेडिसिटी अस्पतालका अध्यक्ष उपेन्द्र महतोले चेम्बर र मेडिसिटीबीचको सहकार्य नयाँ नभई विगतदेखिको सम्बन्धको निरन्तरता भएको बताए। उनले चेम्बरका सदस्य तथा व्यवसायीलाई अझ प्रभावकारी, सहज र गुणस्तरीय स्वास्थ्य सेवा उपलब्ध गराउने प्रतिबद्धता व्यक्त गरे।