वासिङ्टन डीसी। अमेरिका र क्युबाबिचको तनाव फेरि चर्किएको छ।

अमेरिकी राष्ट्रपति डोनाल्ड ट्रम्पको प्रशासनले क्युबाका राष्ट्रपति मिगुएल डियाज–कानेल, उनकी पत्नी तथा उच्च सरकारी अधिकारीहरूमाथि नयाँ प्रतिबन्ध लगाएको छ।

अमेरिकाले क्युबा सरकारमाथि थप दबाब सिर्जना गर्न यो कदम चालेको जनाएको छ। नयाँ प्रतिबन्धपछि दुवै देशबिचको सम्बन्धमा थप चिसोपना आएको छ। क्युबाले भने अमेरिकाको निर्णयलाई आफ्नो सार्वभौमिकतामाथिको आक्रमण र आन्तरिक मामिलामा खुला हस्तक्षेपको संज्ञा दिएको छ।

अमेरिकाले पूर्वराष्ट्रपति राउल क्यास्ट्रोका छोरा अलेजान्द्रो क्यास्ट्रो एस्पिन तथा उनका परिवारका सदस्यहरूलाई समेत प्रतिबन्धको सूचीमा राखेको छ। अमेरिकी प्रशासनले उनीहरूको अमेरिकास्थित सम्पत्ति र बैंक खाता रोक्का गर्ने निर्णय गरेको जनाएको छ।

यद्यपि, विश्लेषकहरूले ती व्यक्तिहरूको अमेरिकी वित्तीय प्रणालीमा सीमित उपस्थिति रहेको बताउँदै प्रतिबन्धलाई मुख्यतः राजनीतिक सन्देशका रूपमा व्याख्या गरेका छन्।

ट्रम्प प्रशासनले क्युबा सरकारप्रति लामो समयदेखि कडा नीति अवलम्बन गर्दै आएको छ। यसअघि अमेरिकाले क्युबामाथि ऊर्जा नाकाबन्दीसमेत लागू गरेको थियो, जसका कारण त्यहाँ इन्धन अभाव, विद्युत् कटौती तथा खाद्य सङ्कट थप गहिरिएको बताइएको छ।

ट्रम्पले क्युबा गम्भीर आर्थिक सङ्कटमा रहेको दाबी गर्दै त्यहाँको सरकारले देशलाई प्रभावकारी रूपमा सञ्चालन गर्न नसकेको आरोप लगाएका छन्। उनले क्युबामा पर्यटन तथा प्राकृतिक स्रोतको ठुलो सम्भावना भए पनि वर्तमान नेतृत्वले त्यसको उचित उपयोग गर्न नसकेको टिप्पणी गरे।

क्युबाका राष्ट्रपति मिगुएल डियाज–कानेलले अमेरिकामाथि जानाजानी तनाव बढाउने प्रयास गरेको आरोप लगाएका छन्। ट्रम्प प्रशासनले क्युबालाई झुकाउन र त्यहाँका नागरिकलाई दुःख दिन खोजेको उनले बताए।

क्युबाका विदेशमन्त्री ब्रुनो रोड्रिगेजले पनि अमेरिकी प्रतिबन्धको कडा आलोचना गर्दै वासिङ्टनले दुई देशबिच टकराब बढाउने वातावरण सिर्जना गरिरहेको आरोप लगाए। क्युबा सरकारले कुनै पनि बाह्य दबाब अगाडि नझुक्ने स्पष्ट पारेको छ।

अमेरिकाले व्यक्ति मात्र होइन, क्युबाका विभिन्न सरकारी तथा सामाजिक संस्थामाथि पनि प्रतिबन्ध लगाएको छ। प्रतिबन्धित संस्थाहरूमा क्युबाको रक्षा मन्त्रालय, जनताबिच मित्रताका लागि संस्थान,पर्यटनसम्बन्धी संस्था अमिस्टुर क्युबा, तथा क्रान्तिको रक्षा समितिहरू रहेका छन्।

यसबाहेक राष्ट्रपति डियाज–कानेलकी पत्नी लिस कुएस्ता पेराजा र उनका सौतेनी छोरा मिगुएल एनिडो कुएस्ता माथि पनि प्रतिबन्ध लगाइएको छ।