अत्तरिया। कैलाली भन्सार कार्यालय धनगढीले तीन महिनामा एक अर्ब ७९ करोड २८ लाख रुपैयाँ राजस्व सङ्कलन गरेको छ। यो तथ्यांक चालु आव ०८२/८३ को साउनदेखि असोजसम्मको हो।

कार्यालयका सूचना अधिकारी खिमप्रसाद अर्यालका अनुसार भन्सार महसुलतर्फ ६९ करोड ६७ लाख, मूल्य अभिवृद्धि करतर्फ ६८ करोड ९८ लाख, अन्तःशुल्कतर्फ पाँच करोड तीन लाख र अन्यतर्फ ३५ करोड ५८ लाख रुपैयाँ राजस्व सङ्कलन भएको छ। चालु आर्थिक वर्षका कुनै पनि महिनामा राजस्व सङ्कलन लक्ष्यमा भने पुग्न सकेको छैन।

साउनमा ७१ करोड ६१ लाख राजस्व सङ्कलन गर्ने लक्ष्य रहेकामा ५७ करोड ८० लाख, भदौमा ७४ करोड २१ लाख राजस्व सङ्कलनको लक्ष्य रहेकामा ५३ करोड ७० लाख र असोजमा ७६ करोड ७७ लाख राजस्व सङ्कलनको लक्ष्य रहेकामा ६७ करोड ७८ लाख रुपैयाँ मात्रै राजस्व सङ्कलन भएको सूचना अधिकारी अर्यालले जानकारी दिए। चालु आवमा नौ अर्ब ७१ करोड १५ लाख रुपैयाँ राजस्व सङ्कलन गर्ने लक्ष्य रहेको उनले बताए।

तीन महिनामा सङ्कलन भएको राजस्व वार्षिक लक्ष्यको १८ दशमलव ४६ प्रतिशत हो। आव ०८१/८२ मा पनि राजस्व लक्ष्यअनुसार सङ्कलन भएको थिएन। गत आवमा ११ अर्ब १६ करोड २६ लाख राजस्व सङ्कलनको लक्ष्य रहेकामा आठ अर्ब ६६ करोड ९८ लाख रुपैयाँ मात्रै राजस्व सङ्कलन भएको सूचना अधिकारी अर्यालले जानकारी दिए। यो वार्षिक लक्ष्यको ७७ दशमलव ६७ प्रतिशत मात्रै हो।