सुनसरी। यही कात्तिक १३ र १४ गते परेको बेमौसमी वर्षाले सुनसरीका किसानको पाक्न लागेको धान तथा तरकारीबाली क्षति पुर्‍याएको छ। जिल्लामा लगाइएको धान, तरकारीबालीमा क्षति पुग्दा साढे दुई अर्ब रुपैयाँभन्दा बढी नोक्सान भएको जिल्लास्थित कृषि ज्ञान केन्द्रले जनाएको छ।

केन्द्रका प्रमुख नीलकमल सिंहले जिल्लामा ४८ हजार ९०० हेक्टरमा धानखेती हुने गरेकामा वर्षाले करिब १४ हजार ४०० हेक्टरमा क्षति पुर्‍याएको जानकारी दिए। उनका अनुसार धानमध्ये राधाबार, बासमतीलगायत जातका बालीमा बढी क्षति पुगेको छ।

“अगौटे जातका करिब २० प्रतिशत किसानले धान काटिसकेका थिए, बाँकी हावाहुरी र वर्षाले खेतमा लडाएको छ,” सिंहले भने, “अहिलेसम्म करिब नौ हजार ६०० हेक्टरको धान मात्र काटिएको छ। बाँकी बाढी र निरन्तरको वर्षाका कारण कुहिने अवस्थामा पुगेको छ।”

अहिले पनि वर्षा भइरहेकाले किसानले काटेर राखेको धान पनि उठाउन समस्या भइरहेको उनको भनाइ छ। “केही दिनमा घाम लाग्यो भने पानी सुकेपछि लडेको धान निकाल्न सकिन्छ, तर केही गुणस्तर भने घटेरै आउँछ, नभए त्यही कुहिएर जाने अवस्था आउँछ,” उनले भने।

रामधुनी नगरपालिका ९ का किसान जंगबहादुर घिमिरेले दुई बिघामा लगाएको धान वर्षाले पूरै नष्ट पारेको बताए। उनका अनुसार वर्षाले खेतमा बाँकी रहेको धान पनि कुहिने अवस्था छ। “करिब १२ कठ्ठा जति धान खान वा गाईवस्तुलाई घाँसका रूपमा प्रयोग गर्न पनि नमिल्ने गरी क्षति भएको छ। दुई दिनको वर्षाले दुई लाखभन्दा बढीको नोक्सानी भयो,” उनले भने।

घिमिरेले पाकेको धान केही काटेर राखेको भए पनि वर्षाले कुटेर क्षति पुर्‍याएको बताए। उनले भने, “गत असोजमा आएको वर्षाले खासै नोक्सान गरेन, तर अहिलेको वर्षाले काटेको र काट्न बाँकी धान पूरै नष्ट गर्‍यो। रोपाइँका सकयमा पानीको अभाव भयो, डिप बोरिङमार्फत रोपेको धान पाक्ने बेला वर्षाले तहसनहस बनायो । हाम्रो जीविकापार्जन भनेकै खेती हो, अरु केही पेसा व्यवसाय छैन।”

रामधुनीका किसान सूरकुमार राईले करिब नौ कठ्ठामा लगाएको तरकारी र आठ कठ्ठाको धान बेमौसमी वर्षाले नष्ट पारेको बताए। उनले भने, “तरकारी फलिसकेको थियो। धान पनि पाक्न लागेको थियो। सबै खेतमै लडायो। यही धान र तरकारी वर्षभरि खाने अन्नको व्यवस्थापन गर्छौं, अब कसरी वर्षदिन गुजारा गर्ने भन्ने चिन्ता छ।”

सुनसरीमा ४५८ हेक्टरमा हुने कोदोखेतीमध्ये करिब १० प्रतिशतमा क्षति पुगेको कृषि ज्ञानमा केन्द्रका प्रमुख सिंहले बताए। उनले भने, “कोदोको बोट अलिक होचो र बलियो हुने भएकाले कम क्षति भयो।” आठ हजार १०० हेक्टरमा हुने तरकारीखेतीमध्ये करिब ९५ प्रतिशतमा क्षति पुगेको उनको भनाइ छ।

प्रमुख सिंहका अनुसार फलेका काँक्रो, परवल, बोडी, घिरौँलालगायत तरकारी तथा बिरुवा पनि नष्ट भएको छ। जिल्लामा ५३० हेक्टरमा हुने केरा खेतीमध्ये ८० प्रतिशत वर्षाले नष्ट गरेको जनाउँदै उनले केही उखु खेतीमा पनि क्षति पुगेको बताए।

जिल्लाका देवानगन्ज, रामधुनी, कोसी, इनरुवा र भोक्राह नरसिंह गाउँपालिकामा सबैभन्दा बढी धान, केरा र तरकारी खेतीमा क्षति पुर्‍याएको ज्ञान केन्द्रले जनाएको छ। केन्द्रका प्रमुख सिंहका अनुसार अहिलेसम्म संकलन भएको विवरणमा करिब दुई अर्ब ५० करोड रुपैयाँबराबरको क्षति भएको छ। उनले भने, “सबै पालिकाबाट क्षतिको विवरण संकलन भइरहेको छ। यसका लागि सम्बन्धित निकायलाई विवरण संकलनका लागि पत्राचार गरिसकिएको छ।” -रासस