काठमाडौँ। नेकपा एमाले महासचिव शंकर पोखरेलले राज्यलाई बलियो बनाउन राज्य र जनताबीचको सम्बन्धलाई घनिष्ठ बनाउनुपर्ने जोड दिएका छन्।

निजामती कर्मचारी सङ्गठन केन्द्रीय कार्यसमितिको तेस्रो बैठकमा आज (शनिबार) उनले जनतासँग राज्यको सम्बन्ध घनिष्ठ बनाउन सरकारले सेवा प्रभावकारी बनाउनुपर्ने धारणा राखे। उनले जनता र राज्यबीचको सम्बन्ध जीवन्त बनाउने भूमिका निजामती कर्मचारीको रहेको बताए।

“राज्यलाई बलियो बनाउन नागरिक हक सुनिश्चित गर्नुपर्छ। राज्य र जनतालाई जोड्ने काम गर्नुपर्छ। त्यसपछि मात्र हामी समृद्धिको यात्रामा अघि बढ्न सक्दछौँ‚” उनले भने। उनले निर्वाचन सामना गर्न राज्यका प्रमुख अङ्गबीच एकता र सहकार्य आवश्यक रहेकामा जोड दिए।

“अहिले राज्य कमजोर अवस्थामा छ। यस्तो बेला राज्य बलियो बनाउने काम निजामती प्रशासनको हो। कमजोर अवस्थामा रहेको राज्यलाई स्थायी सरकारको नेतृत्व गरिरहेको निजामतीले बलियो बनाउने अगुवाइ गर्न सक्दछ‚” उनले भने‚ “मुलुकको वर्तमान र भविष्यका लागि जागरुक तप्काका रूपमा निजामती कर्मचारी रहनुपर्दछ।”

महासचिव पोखरेलले नवयुवा राज्य र राजनीतिक दलसँग असन्तुष्टि रहेका बताउँदै गत २३ र २४ भदौको घटना यसको उदाहरणका रूपमा रहेको उल्लेख गरे। उनले नवयुवाले अगाडि सारेका भ्रष्टाचार नियन्त्रण‚ सुशासन कायम गर्नेलगायत विषयलाई राजनीतिक नेतृत्वले समाधान गर्ने बताए।

कार्यक्रममा एमाले केन्द्रीय सदस्य भोला पोखरेलले निजामती कर्मचारी स्थायी सरकार भएकाले बाह्य शक्तिबाट मुलुकलाई जोगाउन भूमिका खेल्न आग्रह गरे। संगठनका अध्यक्ष भवानी दाहालले राज्य कमजोर भएको बेला निजामती कर्मचारी चनाखो भएर बस्नुपर्ने र जनहितमा केन्द्रित भएर सेवाप्रवाह गर्नुपर्नेमा जोड दिए।