काठमाडौं। अमेरिकी राष्ट्रपति डोनाल्ड ट्रम्पले शनिबार शिकागोमा आफ्नो नयाँ नामकरण गरिएको ‘डिपार्टमेन्ट अफ वार’ (युद्ध मन्त्रालय) लागू गर्ने धम्की दिएका छन्। डेमोक्रेटिक पार्टी नेतृत्वमा रहेका शहरहरूमा सेना तैनाथ गर्ने ट्रम्पको दबाबले तनाव थप बढेको छ।

यो कदम वासिङ्टनमा पहिले गरिएको अपरेसनसँग मेल खान्छ, जहाँ ट्रम्पले नेसनल गार्ड तैनाथ गरेका थिए र सङ्घीय एजेन्टहरूको संख्या बढाएका थिए। त्यसपछि राजधानीमा व्यापक विरोध प्रदर्शन भएको थियो, जहाँ हजारौँ मानिस सडकमा ओर्लिएका थिए।

ट्रम्पले आफ्नो सामाजिक सञ्जाल ‘ट्रुथ सोसल’मा लेखेका छन्, “शिकागोले चाँडै थाहा पाउनेछ कि यसलाई युद्ध मन्त्रालय किन भनिन्छ।”

तर इलिनोइस राज्यका डेमोक्रेटिक गभर्नर जेबी प्रिट्जकरले ट्रम्पको उक्त अभिव्यक्तिप्रति कडा विरोध जनाउँदै भने, “संयुक्त राज्य अमेरिकाका राष्ट्रपतिले आफ्नै सहरसँग युद्ध गर्ने धम्की दिनु सामान्य कुरा होइन, मजाक पनि होइन। इलिनोइस कुनै तानाशाहबाट डराउने छैन।”

ट्रम्पको पोस्टमा एउटा एआई–निर्मित छवि र उक्त फिल्म ‘एपोक्यालिप्स नाउ’ को प्रसिद्ध उद्धरण समावेश थियो—“मलाई बिहान निर्वासनको गन्ध मन पर्छ।” उक्त फिल्ममा अमेरिकी सेनाले नापाम हतियार प्रयोग गर्दा यस्तो भनिएको थियो।

५९ वर्षीय ट्रम्पले अगस्टको अन्त्यदेखि नै शिकागोविरुद्ध यस्तो धम्की दिँदै आएका छन्। शनिबार ‘यो फासीवादी शासन रोक’ भन्ने प्लेकार्डसहित शिकागोमा प्रदर्शन भयो। प्रदर्शनकारीहरूले ‘ट्रम्प होइन, सेना छैन’ भन्दै विरोध जनाए।

त्यसै दिन वासिङ्टनमा पनि हजारौँको सहभागितामा विरोध मार्च भएको थियो, जहाँ प्रदर्शनकारीहरूले उल्टो अमेरिकी झण्डा बोकेका थिए, जुन राष्ट्र संकटको प्रतीक मानिन्छ।

ट्रम्पले यसअघि पनि लस एन्जलस, वासिङ्टन र अन्य शहरहरूमा सेना र सङ्घीय एजेन्ट तैनाथ गरिसकेका छन्। यो कदम कानूनी चुनौती र तीव्र आलोचनाको विषय बनेको छ। आलोचकहरूले यसलाई अधिनायकवादको प्रहार भनेका छन्।

लस एन्जलसका अधिकारीहरूले पनि आइसिई एजेन्टहरूको हिंसात्मक कार्यप्रणालीको विरोध गरेका छन्। ती एजेन्टहरूले प्रायः मास्क लगाएर, पहिचान नखुलेका रुपमा र बिना वारन्ट मानिसहरूलाई पक्रने गरेको आरोप छ।

ट्रम्पले शिकागोका साथै बाल्टिमोर र न्युअर्लिन्समा पनि यस्तो कारबाहीको चेतावनी दिएका छन्। शुक्रबार ट्रम्पले रक्षा मन्त्रालयको नाम ‘युद्ध मन्त्रालय’मा परिवर्तन गर्ने आदेशमा हस्ताक्षर गरे। उनले भने, “यसले विश्वलाई विजयको सन्देश दिनेछ।”

पेन्टागन प्रमुख पिट हेग्सेथले यो कदमलाई स्वागत गर्दै अमेरिकाले आफ्नो लक्ष्य पूरा गर्न कुनै सम्झौता नगर्ने र आवश्यक परे हिंसा प्रयोग गर्ने सङ्केत दिएको बताए।