काठमाडौँ। रुस र युक्रेनले बिहीबार १८५ युद्धबन्दीहरू साटासाट गरेका छन्। रुसको रक्षा मन्त्रालयका अनुसार यो आदानप्रदान द्वन्द्व अन्त्य गर्ने सन्दर्भमा प्रगति नभएको भए पनि जारी रहेको विनिमयको शृङ्खलामा पछिल्लो हो।
रुसको रक्षा मन्त्रालयले टेलिग्राममार्फत युक्रेनले १८५ रूसी सैनिकहरू फिर्ता गरेको र सो क्रममा २० जना सर्वसाधारणलाई पनि रिहा गरिएको जनाएको छ।
युक्रेनी राष्ट्रपति भोलोदिमिर जेलेन्स्कीले पनि रिहा गरिएका युक्रेनीहरूको तस्बिरहरू सामाजिक सञ्जालमा पोस्ट गर्दै आदानप्रदानको पुष्टि गरे। जेलेन्स्कीले उनीहरूलाई आवश्यक पर्ने सबै सहयोग प्राप्त गर्ने वातावरण तयार भएको बताए।
उनले भने, “आक्रमण सुरु भएदेखि नै हामीले हाम्रा सात हजारभन्दा बढी मानिसहरूलाई घर फर्काएका छौँ।”यसअघि गत मे र जुलाईको बीचमा इस्तानबुलमा रूसी र युक्रेनी प्रतिनिधिमण्डलहरूबीच भएको तीन चरणको शान्ति वार्ताको परिणाम स्वरूप ठूलो मात्रामा कैदी आदानप्रदान भएको थियो।
दुवै पक्षले युद्धको बीचमा मारिएका सैनिकहरूको स्वदेश फिर्तीका धेरै चरणहरू पनि सञ्चालन गरेका छन्, जसलाई दुई देशबीचको सहयोगको क्षेत्रका रूपमा हेरिएको छ।
सन् २०२२ मा रुसले आक्रमण सुरु गरेदेखि दुवै पक्षका दशौँ हजार सैनिक मारिएका छन्। यद्यपि दुवै पक्षले आफ्नो हताहतको तथ्याङ्क भने नियमित रूपमा सार्वजनिक गरेका छैनन्।
