सुर्खेत। मुख्यमन्त्री यामलाल कँडेलले कर्णाली प्रदेशसभा भवन पुनर्निर्माण गर्न निर्देशन दिएका छन्।

गत भदौ २२ र २३ गते जेन-जी आन्दोलनका क्रममा क्षति पुगेको प्रदेशसभाको पुनर्निर्माण कार्य सुरु गर्न सुझाव दिएका हुन्। प्रदेशको गौरव र राज्यको प्रतिष्ठासँग जोडिएको भवनलाई लामो समयसम्म जीर्ण अवस्थामा राख्न नहुने भन्दै त्यसको पुनर्निर्माण र सरसफाइ अभियान सुरु गर्नुपर्ने उनको भनाइ थियो।

सभामुख नन्दा गुरुङ र प्रदेशसभा सचिव जीवराज बुढाथोकीसँग आज (मंगलबार) प्रदेशसभामा भएको भेटका क्रममा मुख्यमन्त्री कँडेलले सभाको हलबाहेक अन्य संरचनाको पुनर्निर्माण नियमित बजेटबाटै सुरु गर्न सुझाए। “बजेटको अभावलाई कारण नबनाई तत्काल काम सुरु गर्नुस्। आवश्यकताअनुसार प्रदेश सरकारले थप बजेटको व्यवस्था गर्छ,” उनले भने। सुरुआती चरणमा आवश्यक आधारभूत व्यवस्थापनजस्तै प्लास्टिकका कुर्सी, सामान्य सरसफाइसहित १० दिनभित्र प्रशासनिक भवनको पुनर्निर्माण व्यवस्थापन गर्न पनि उनले निर्देशन दिए।

भदौ २४ गतेको आन्दोलनपश्चात करिब ५० दिन बितिसक्दा पनि प्रदेशसभा परिसरमा सरसफाइ र पुनःसंरचना सुरु नभएकोप्रति असन्तुष्टि जनाए। उनले भने, “कर्मचारी हुनुहुन्छ तर ढलेका बोर्ड, फोहोर र क्षतिग्रस्त वस्तु उठाउने काममा पनि ध्यान दिइएको छैन। यो सामान्य काम हो। अब परिस्थिति सामान्य बनाउन सबै अग्रसर हुनुपर्छ।”

मुख्यमन्त्री कँडेलले प्रदेश सरकारको प्राथमिकतामा प्रदेशसभा भवनको पुनर्निर्माण, प्रशासनिक सेवा सहज बनाउने र सभाको नियमित बैठक सञ्चालन सुनिश्चित गर्ने विषयहरू रहेको बताए। भेटघाटमा सभामुख गुरुङ र सचिव बुढाथोकीले पनि मुख्यमन्त्रीलाई भवन पुनर्निर्माणका लागि आवश्यक सहयोगका लागि अनुरोध गर्दै निर्माण कार्यको प्रक्रिया अघि बढाउने प्रतिबद्धता जनाए।