काठमाडौँ। उपराष्ट्रपति रामसहायप्रसाद यादवसँग नेपालका लागि कतारका राजदूत मिसाल मोहम्मद अली अल अन्सारीले भेट गरेका छन्।

यादवको सचिवालयका अनुसार भेट लैनचौरस्थित उपराष्ट्रपतिको कार्यालयमा बुधबार भएको हो। भेटमा शुभकामना आदानप्रदान‚ नेपाल-कतारबीचको द्विपक्षीय सम्बन्ध, बहुपक्षीय तथा क्षेत्रीय मञ्चमा सहकार्य, श्रम, आप्रवासन, व्यापारलगायत विषयमा छलफल भएको थियो।

उपराष्ट्रपति यादवले सन् १९७७ मा कूटनीतिक सम्बन्ध स्थापना भएयता नेपाल र कतारबीचको सम्बन्ध मित्रता, आपसी सम्मान, विश्वास र सहयोगमा आधारित रही उत्कृष्ट रूपमा विकसित भएकामा सन्तोष जनाए। उनले संयुक्त राष्ट्रसंघ तथा असंलग्न आन्दोलनका सदस्य राष्ट्रका रूपमा नेपाल र कतारले विभिन्न बहुपक्षीय तथा क्षेत्रीय मञ्चमा निरन्तर सहकार्य प्रशंसनीय रहेको बताए।

हालैका वर्षमा उच्चस्तरीय भ्रमणहरूको आदानप्रदानले दुई देशबीचको सम्बन्ध अझ घनिष्ट बनेको यादवको भनाइ छ। कतारमा करिब तीन लाख ६५ हजार नेपाली श्रमिक कार्यरत रहेको उल्लेख गर्दै उपराष्ट्रपति यादवले रोजगारीको अवसर प्रदान गरेकामा कतार सरकारप्रति धन्यवाद व्यक्त गरे। “नेपाली श्रमिकले कतारको अर्थतन्त्रमा पुर्याएको योगदान र नेपालमा रहेका परिवारलाई सहयोग गर्दै नेपालको अर्थतन्त्रलाई सुदृढ बनाएकामा खुसी व्यक्त गर्दछु‚” उनले भने, “नेपाल सरकार सुरक्षित तथा सम्मानजनक वैदेशिक रोजगारी सुनिश्चित गर्न प्रतिबद्ध छ।”

उपराष्ट्रपति यादवले सन् २०२५ को रमादान तथा इदका अवसरमा नेपाली बन्दीहरूलाई ‘अमिरी क्षमादान’ प्रदान गरेकामा कतारका अमिरप्रति हार्दिक धन्यवाद व्यक्त गरे। साथै नेपाल २०२६ मा अतिकम विकसित मुलुकको श्रेणीबाट स्तरोन्नति गर्ने र २०३० सम्म मध्यम आय भएको देश बन्ने लक्ष्य राखेको सन्दर्भमा कतारसहितका मित्र राष्ट्रबाट थप लगानी तथा सहयोग आवश्यक रहेको यादवले बताए।

नेपाल र कतारबीचको प्रत्यक्ष हवाई सम्पर्कले पर्यटन प्रवर्द्धन तथा व्यापार विस्तारमा सहयोग पुर्‍याउने विश्वास व्यक्त गर्दै उपराष्ट्रपति यादवले काठमाडौं र दोहा प्रत्यक्ष उडानलाई अझ प्रभावकारी बनाउनुपर्ने आवश्यकतामा जोड दिए। नेपालको प्राकृतिक सौन्दर्य, सांस्कृतिक सम्पदा तथा नेपाली जनताको आतिथ्यभाव कतारी पर्यटकका लागि आकर्षक गन्तव्य बन्न सक्ने उनको भनाइ छ।

कतारको राष्ट्रिय दिवसका अवसरमा उपराष्ट्रपति यादवले राजदूतमार्फत कतारका अमिर सेख तमिम बिन हमाद अल-थानी तथा कतारका जनतालाई हार्दिक बधाई दिँदै अमिरको सुस्वास्थ्य, खुसी तथा कतार जनताको शान्ति, प्रगति र समृद्धिको कामना गरे।

भेटमा कतारका राजदूत अन्सारीले नेपाल र कतारबीच धेरै पुरानो तथा बलियो सम्बन्ध रहेको उल्लेख गर्दै नेपाल सरकारको अनुरोधमा कतारले तीस नेपालीलाई कतारको कारागारबाट रिहा गरेको बताए।