भक्तपुर। नेकपा एमाले अध्यक्ष केपी ओलीले आफ्नो पार्टीले देशलाई गलत दिशामा जान नदिने प्रतिबद्धता जनाएका छन्।

एमालेको ११औँ राष्ट्रिय महाधिवेशनको भक्तपुरको सल्लाघारीमा आयोजित उद्घाटनसत्रमा उनले अनेक चुनौती र प्रहारलाई चिर्दै एमालेको पक्षमा जनलहर उर्लिएको दाबी गरे। एमाले कुनै राजनीतिक ‘स्टन्ट’ नगरी समृद्ध मुलुक बनाउने संकल्पमा अग्रसर रहने उनको भनाइ छ। उनले सुशासन र विकास चाहने सम्पूर्ण शक्तिले एमालेलाई साथ दिएको उल्लेख गरे।

“लोकतन्त्र अजेय छ‚ नेकपा एमाले अजम्मरी छ। लोकतन्त्र र जनताको हितमा समर्पित एमालेजस्तो शक्तिलाई निर्णायक राष्ट्रिय शक्ति बनाउनुपर्छ। सिंगो देशलाई समृद्ध र सुखी बनाउने गन्तव्यतर्फ हामी अघि बढिरहेका छौँ‚” ओलीले भने‚ “कम्युनिस्ट पार्टी जति बलियो भयो‚ त्यति नै राष्ट्रियता बलियो हुन्छ। एमाले सामाजिक न्याय र सामाजिक न्यायको सुरुआती अभियन्ता पार्टी हो। नागरिकले जीवनको आधार यही शक्ति हो।”

एमाले समावेशिताको अगुवा भएको बताउँदै उनले राष्ट्रिय राजनीतिमा एमालेले सबै क्षेत्रको समावेशीतालाई स्थापित गरेको बताए। एमाले नेपाली विशेषतासहितको समाजवाद निर्माणमा लागेको उल्लेख गर्दै उनले एमाले गाउँमुखी र जनसहभागितामूलक विकास तथा ठूला विकास योजनाको अभियन्ता भएको बताए।

यो पनि…

पार्टीपंक्ति एकताबद्ध भएर उभिऔँ : ओली [सम्बोधनको पूर्ण पाठ]

महाधिवेशनको विशाल उपस्थितिलाई बेवास्ता नगर्न स्मरण गराउँदै उनले विघटित संसद् पुनःस्थापना हुनेमा आफूहरु विश्वस्त रहेको अध्यक्ष ओलीले बताए।

गत २३ र २४ भदौको जेन-जी आन्दोलनमा घुसपैठका कारण राज्य र राज्यका संरचनालाई कमजोर बनाइए पनि शान्तिपूर्ण र न्यायपूर्ण बलको जगमा लोकतन्त्रलाई फर्काइने अध्यक्ष ओलीको भनाइ थियो। उनले अहिलेको सरकार निर्वाचनको वातावरण बनाउनभन्दा पूर्वाग्रह र संविधानविपरीतका काममा लागेको आरोप पनि लगाए।

हेर्नुहोस् ओलीको सम्बोधनको पूर्ण पाठ :